ସଡକ ସୁରକ୍ଷା ଜୀବନ ରକ୍ଷା
ସଡକ ସୁରକ୍ଷା ଜୀବନ ରକ୍ଷା
ଅତି ଅଲିଅଳୀ ଅତି ଚୁଲୁବୁଲି
କୁନି ଝିଅ ମନୋରମା
ନାଚି ଖେଳି ତା'ର ସମୟ କଟଇ
ଖୁସିରେ ନ ଥାଏ ସୀମା ||
କନ୍ଦୁକ ଧରି ସେ ଘରୁ ବାହାରିଲା
ଖେଳିବ ବୋଲି ସେ ଦିନେ
ରାସ୍ତାରେ ଖେଳିବା ବିପଦରେ ଭରା
ନଥିଲା ତାହାର ମନେ ||
ରାସ୍ତାର ଉପରେ ସବୁବେଳେ କେତେ
ଯାନ ବାହନ ଚାଲଇ
ରାସ୍ତାର ଉପରେ ଚଳପ୍ରଚଳର
ନିୟମ କାନୁନ୍ ନେଇ ||
ଟ୍ରାଫିକ୍ ନିୟମ ମାନିବା ଜରୁରୀ
ସଡକ ସୁରକ୍ଷା ପାଇଁ
ଧନ ଜୀବନର ସୁରକ୍ଷା ନିମିତ୍ତ
ପ୍ରଯୁଜ୍ୟ ତାହା ଅଟଇ ||
ଅବୋଧ ବାଳିକା କୁନି ମନୋରମା
ଏ କଥା ଜାଣି ନଥିଲା
ସେହି କାରଣରୁ କନ୍ଦୁକ ଧରିସେ
ରାସ୍ତାପରେ ଖେଳୁଥିଲା ||
ଦ୍ରୁତ ବେଗେ ମାଡି ଆସିଲା ସହସା
ଗୋଟିଏ ମୋଟର କାର
କନ୍ଦୁକ ପଛରେ ଗୋଡାଇ ଗୋଡାଇ
କାର୍ ଆଗରେ ହାଜର ||
ଆଉ ଦୁଇ ହାତ ଆଗକୁ ଗଡିଲେ
କୁନି ଝିଅ ମନୋରମା
କାର ଚକ ତଳେ ପେଷି ହୋଇଯା'ନ୍ତା
ଦୁଃଖର ନଥାନ୍ତା ସୀମା ||
ସହସା କୁଆଡୁ ଆସି ଉଭା ହେଲେ
ଜଣେ ଦେବ ଦୂତ ପରୀ
ଟାଣି ନେଇ ଗଲେ ମନୋରମାକୁ ସେ
ମୃତ୍ୟୁ ମୁଖରୁ ଉଦ୍ଧରି ||
ବୁଝାଇ କହିଲେ ମନୋରମା ତୁମେ
ଆଜିଠାରୁ ମନେରଖ
ସଡକ ସୁରକ୍ଷା ଟ୍ରାଫିକ୍ ନିୟମ
ମାନି ଚଳିବାକୁ ଶିଖ ||
ପିତା ମାତା ସର୍ବେ ମନଧ୍ୟାନ ଦେଇ
ଏହି କଥା ମନେରଖ
ନିଜର ସନ୍ତାନେ ରାସ୍ତାରେ ଖେଳିବା
କଥା କର ତଦାରଖ ||
ଟ୍ରାଫିକ୍ ନିୟମ ନିଜ ସନ୍ତାନଙ୍କୁ
ସକଳେ ଶିଖାଇ ଦିଅ
ସେହି ନିୟମକୁ ଯେପରି ପାଳିବେ
ସେଥିପ୍ରତି ଦୃଷ୍ଟି ଦିଅ ||
ତାହା ନହୋଇଲେ ଅକାଳରେ ଶିଶୁ
ଜୀବନ ହରାଇ ଦେବ
ନିସନ୍ତାନ ହେବା ତୁମରି ଭାଗ୍ୟରେ
ମୃତ୍ୟୁ ଆସି ଲେଖି ଦେବ ||
ବେଳ ଥାଉ ଥାଉ ତୁମ୍ଭେମାନେ ଯେବେ
ସାବଧାନ ହୋଇଯିବ
ସବୁଦିନ ପାଇଁ ରାସ୍ତା ଦୁର୍ଘଟଣା
ସମ୍ପୂର୍ଣ୍ଣ ଉଭେଇ ଯିବ ||
ଅନେକ ନୀରିହ ଜୀବନର ରକ୍ଷା
କରିପାରିବରେ ତୁମେ
ଅକାଳ ମୃତ୍ୟୁର ବିଭୀଷିକା ଆଉ
ଦେଖିବନି କେବେ ତୁମେ ||