ସବୁଜ ସୁନ୍ଦର ପାହାଡ଼

ପାହାଡ଼ ତୁ କାହିଁ ସବୁଜ ସୁନ୍ଦର

କେଉଁଠି ଧୂସର ଲଣ୍ଡା,

ପାଦଦେଶେ ତୋର ଚାଷ ଜମି ସହ

ରହିଥାଏ ଗାଆଁ ଗଣ୍ଡା ।

ତୋ ବକ୍ଷରୁ ଝରି ଆସଇ ଝରଣା

ଜଳ ଦାନେ ହୋଇ ରତ,

ଜୀବଜନ୍ତୁ ଆଉ ଉଦ୍ଭିଦମାନଙ୍କ

କରଇ ଅଶେଷ ହିତ ।

ଯେଉଁଠି ତୁ ଲଣ୍ଡା ଖଣିଜରେ ପୂର୍ଣ୍ଣ

ନର କରି କଉଶଳ,

ଧାତଵ ପଦାର୍ଥ ବାହାର କରଇ

ଦେଖୁଥାଉ ଜଳଜଳ ।

ସାମାଜିକ ବନୀକରଣ କରିଲେ

ବିଶୁଦ୍ଧ ହୋଇବ ବାୟୁ,

ତୋର ଲଣ୍ଡା ବୁକୁ ସୁନ୍ଦର ଦିଶିବ

ବଢ଼ିବ ମାନବ ଆୟୁ ।

ନାନାଜାତି ଫୁଲ ଫଳେ ତୁ ହସିବୁ

ପକ୍ଷୀଏ ଗାଇବେ ଗୀତ,

ସୌନ୍ଦର୍ଯ୍ୟ ପିପାସୁ କବି ଭାବୁକଙ୍କ

ପ୍ରସନ୍ନ ହୋଇବ ଚିତ୍ତ ।