ସ୍ବୀକାରୋକ୍ତି
ସ୍ବୀକାରୋକ୍ତି
ମୋ ଭାବନା ଉତ୍ସ ହୁଅଇ ଆଶ୍ବସ୍ତ
ନଭ ଚୁମେ ମୋ' ଆକାଂକ୍ଷା
ତୁମ ମନ୍ତ୍ରମୁଗ୍ଧ ଶବ୍ଦ କେଇପଦ
ଅନ୍ତ କରେ ମୋ ପ୍ରତୀକ୍ଷା ।
ଅଧୀରେ ଅଧୀର ମନ ସରୋବର
ଆନନ୍ଦାଶ୍ରୁ ଯାଏ ଝରି
ସ୍ମୃତିକୁ ଭିଜାଏ ସ୍ବୀକାରୋକ୍ତି ଗାଏ
ପୂତପୟଃ ଅନ୍ତାକ୍ଷରୀ ।
ଚାରିଆଡେ ଖାଲି ରଙ୍ଗର ମେଲଣ
ରଙ୍ଗେ ରଙ୍ଗାୟିତ ମୁହଁ
କେମିତିକା ରଙ୍ଗ ବୋଳିଛ ମୋ ମନେ
ସବୁ ଦିଶେ ତୁମମୟ ।
ସ୍ମୃତି ଖୋଜେ ଆଜି ନୂଆ କିଛି ସ୍ମୃତି
ଅତୀତର ରେଖା ଡେଇଁ
ଫଗୁଣ ଅବିର ଫିକା ଫିକା ସବୁ
ଇପ୍ସିତର ବାଟ ଚାହିଁ ।
ଲକ୍ଷାଧିକ ଭିଡ ନିତି ନୂଆ ମୋଡ
ଅଚିହ୍ନା ଅଚିହ୍ନା ଆଖି
ଏହା ଧ୍ରୁବ ସତ୍ୟ ତୁମେମୋ' ପ୍ରକାଶ
ଅକୁଣ୍ଠେ ପାରିବି ଲେଖି ।