ସ୍ବାଧୀନ ହୋଇ ବି ପରାଧୀନ

ଗରବେ କହୁଛୁ ଆମେରେ ସ୍ବାଧୀନ

ପାଳୁଛୁ ଅଗଷ୍ଟ ପନ୍ଦର,

କିଏ ସେ ସ୍ବାଧୀନ କିଏ ପରାଧୀନ

ଜାଣିଛି ଆମରି ଅନ୍ତର ।

କେତେ କେତେ ଲୋକ ବଳିଦାନ ଦେଇ

ବିଦେଶୀ ଶାସନ ତଡିଲେ ,

କି ଲାଭ ପାଇଲୁ ବିଦେଶୀଙ୍କୁ ତଡି

ଅଣ୍ଟି ଛୁରି ତଣ୍ଟି କାଟିଲେ ।

ଦାନା ଟିକେ ପାଇଁ କାନ୍ଦୁଛି ଗରିବ

ବଢୁଛି ଧର୍ଷଣ ଲୁଣ୍ଠନ ,

ଚାଷୀ ପୁଣି ଏଠି କରେ ଆତ୍ମହତ୍ୟା 

ତଥାପି ମୋ ଦେଶ ସ୍ବାଧୀନ ।

ନିର୍ଭୟା କାନ୍ଦୁଛି ବେବିନା କାନ୍ଦୁଛି

ଇତିଶ୍ରୀ ଚିତ୍କାର ଶୁଭୁଛି ,

ସାଇକେଲ ପୁଣି ଖଟିଆରେ ଏଠି 

ରୋଗୀ ଶବ ବୁହା ହେଉଛି ।

କୋଟି କୋଟି ଟଙ୍କା ଖର୍ଚ୍ଚ ହୋଇ ଏଠି

ମନ୍ତ୍ରୀ ନେତା ସଭା ହେଉଛି ,

କୋଟି କୋଟି ଲୋକ ଭୋକରେ ମରନ୍ତି 

ତାଙ୍କ କଥା କିଏ ବୁଝୁଛି ।

ତଥାପି ଆମେରେ ଗରବେ କହୁଛୁ 

 ଅଗଷ୍ଟ ପନ୍ଦର ଆସିଛି ,

ସ୍ବାଧୀନତା ଆଉ ପରାଧୀନତାର 

ମୂଲ୍ୟ କିଏ ବୁଝିପାରିଛି ।