ସାୟନ୍ତନ
ସାୟନ୍ତନ
ବେଳ ଆସି ରତ ରତ
ସାନ୍ଧ୍ୟ ବାୟୁ ବହିଲା
ଚକ୍ରବାଳ ଦେହେ ରବି
ଥକା ମାରି ବସିଲା ।
କର୍ମଜୀବି କର୍ମ କ୍ଷେତ୍ର
ଗୃହ କଥା ଭାବିଲା
ତର ତର ହୋଇ ସିଏ
ଗୃହ ମୁଖେ ଚଳିଲା ।
ପ୍ରିୟ ପରିଜନ ଘରେ
ଚାହିଁ ବସିଥିବେ
ଫେରିବା ବାଟକୁ ତା'ର
ନିରେଖି ଫେରୁଥିବେ ।
ମିଳିବ ସନ୍ତାନେ ତା'ର
ପିତା ପରିବାର
ପତି ପତ୍ନୀ ସାକ୍ଷାତର
ଆନନ୍ଦ ଅପାର ।
ପିଲାମାନେ ଛୁଟି ପରେ
ଖେଳରୁ ଫେରନ୍ତି
ପକ୍ଷୀଗଣ ଉଡି ଉଡି
ନିଡେ ଫେରୁଥା'ନ୍ତି ।
ଆକାଶର ଉଡୁଥିବା
ପକ୍ଷୀଙ୍କର ସଜ୍ଜା
ଗାଆଁମୁଣ୍ଡ ବରଗଛେ
କାକଳିର ମଜା ।
ଗୋଷ୍ଠଫେରା ଗାଈ ଦାଣ୍ଡେ
ଧୂଳିକୁ ଉଡାଇ
ଗୁହାଳେ ଫେରନ୍ତି ଗାଈ
ହମ୍ବା ରଡି ଦେଇ ।
ତୁଳସୀ ଚଉରା ମୂଳେ
କୁଳ ଭୂଆସୁଣୀ
ସଞ୍ଜବତୀ ଜାଳିଦିଏ
ଭକତିରେ ଆଣି ।
ମାଛିଅନ୍ଧାରୁଆ ବେଳ
କ୍ରମେ ଯାଏ ବିତି
ଗାଁ ମନ୍ଦିରେ ବାଜେ ଘଣ୍ଟ
ହୁଅଇ ଆଳତି ।
ଘରେ ଘରେ ଆନନ୍ଦର
ପରିବେଶ ଏଠି
ପରିବାରେ ମିଳନର
ଆନନ୍ଦ ଯେଉଁଠି ।
କ୍ରମେ ନିଶାଗମେ ହୁଏ
ନିସ୍ତବ୍ଧ ଧରଣୀ
ନିଦ୍ରାଦେବୀ କୋଳେ ଶାନ୍ତି
ଲଭେ ସର୍ବପ୍ରାଣୀ ।