କ୍ୟାଲେଣ୍ଡର୍

ତୁମେ ଫଗୁଣରେ ମଳୟ ପବନ

     ଫେରନ୍ତା ବାଆ ଚଇତି

ପାଗଳ ଭଅଁର  ଉଡି ବୁଲୁଥିବା

    ମତୁଆଲା ପ୍ରଜାପତି ।

ନିଦାଘର ଖରା   ଝାଞ୍ଜି ବାଆ ପୁଣି

    ବରଷାର ଝଡ ରାତି

କାକରରେ ଭିଜା   ନିଶବ୍ଦ ରଜନୀ

    ପଉଷର ଶୀତ ରାତି ।

ଶ୍ରାବଣ ଶ୍ରାବଣୀ   ଶରତ ପାର୍ବଣ

      ଝଲମଲ ଦିନରାତି

ହେମନ୍ତ ଦିପାଳି   ବୋଇତ ବନ୍ଦାଣ

    ମାଣ ବସା ରୀତି ନୀତି ।

  ବୁକୁରେ ତୁମର ଲେଖା ରହିଥାଏ

     ଅସୁମାରୀ ମଧୁ ସ୍ମୃତି

କାନ୍ଥର ପୃଷ୍ଠରେ    ଝୁଲି ରହିଥାଅ

    ଧୀର ସ୍ଥିର ତୁମ ମତି ।

ସବୁବେଳେ ତୁମେ   ହାତ ଠାରି ଡାକି

     କହିଦିଅ ଜନ୍ମ ତିଥି

ତୁମେ ଆଣଦିଅ   ଲେଖାହୋଇଥିବା

      ଲେଖାଥିବା ଦିନ ତିଥି ।

କେଉଁ ଦିନ ଆଣେ    ପୂର୍ଣ୍ଣମୀର ଚାନ୍ଦ      

       କେଉଁଦିନ ଅମାରାତି

କେଉଁ ଦିନ ଆଣେ     ଅସୁମାରୀ ସ୍ବପ୍ନ

      ସପନରେ ସରେ ରାତି ।

କେଉଁଦିନ ପୁଣି    ଚୋରାଏ ସପନ

    ଲୁହରେ ଭିଜାଏ ରାତି 

ତୁମ ବୁକୁପରେ    ଲେଖି ରଖି ଥାଅ

    ମିଳନ ବିରହ ସ୍ମୃତି ।