ଲାଇବ୍ରେରୀ
ପ୍ରୋଫାଇଲ୍
ସାଥୀ
ସାଥୀ
ଜୀବନ ରାସ୍ତାରେ ଚାଲିବାକୁ ହେଲେ
ଦରକାର ସାଥୀଟିଏ
ସେଇ ସାଥୀ ସବୁ ଜୀବନର ପାଇଁ
ଆବଶ୍ୟକ ପଡ଼ିଥାଏ ।
ସମୟ ସ୍ରୋତର ବିଭିନ୍ନ ସ୍ତରରେ
ସାଥୀଟିଏ ଲୋଡା ହୁଏ
ସେଇ ସାଥୀ ପାଇଁ ସମୟ ତାହାର
ଆପେ କେଣେ ଚାଲିଯାଏ ।
ଛୋଟବେଳ କଟେ ସାଙ୍ଗ ସାଥୀ ମେଳେ
କେତେ ମିଠା ସ୍ମୃତି ସିଏ
ବିଦ୍ୟାଳୟ ଠାରୁ କଲେଜ ପର୍ଯ୍ୟନ୍ତ
ସେ ସ୍ମୃତି ନା ଭୁଲି ହୁଏ ।
କର୍ମ କ୍ଷେତ୍ରେ ସାଥୀ ଦରକାର ହୁଏ
ମିଳିମିଶି ରହେ ସିଏ
ତାହାରି ଭିତରେ କେତେ ହସ ଖୁସି
ଭାବ ଦିଆ ନିଆ ଥାଏ ।
ସବୁଠାରୁ ମୂଲ୍ୟବାନ ସାଥୀ ହୁଏ
ଜୀବନର ସାଥୀଟିଏ
ଦୁଃଖ ସୁଖ ଝଡ ଝଞ୍ଜା ଆସୁ ଯଦି
ପାଖେ ରହି ଥିବ ସିଏ ।
ବୁଝିପାରୁଥିବ ହୃଦୟ ବେଦନା
ଦୂରେଇ ଦେବନି ସିଏ
ଏମିତି ସାଥୀଟି ଯାହାକୁ ମିଳିବ
ଭାଗ୍ୟ ତା' ବଦଳି ଯାଏ ।
ଯେତେ କଷ୍ଟ ଆସୁ ଜୀବନେ ତାହାର
ହସି ହସି ସହେ ସିଏ
ଦୁଃଖର ସୁଖର ସାଥୀଟିଏ ହୋଇ
ହାତ ଧରି ଚାଲୁଥାଏ ।
ମନ କଷ୍ଟ ପରି କଥାଟି କୁହେନି
ଧୋକାଟି ଦିଏନି ସିଏ
ଅଭାବୀ ମନର ଅଭାବପଣକୁ
ନେଇ ସିଏ ଚଳୁଥାଏ ।
ନିଃସ୍ବାର୍ଥ ଭାବରେ ଛାଇ ପରି ରହି
ଦୁଃଖ ସୁଖ ବୁଝୁଥାଏ
ଆଘାତଟି ଯଦି ତାକୁ ଲାଗିଥାଏ
ତାକୁ ବେଶୀ କଷ୍ଟ ହୁଏ ।
ସବୁବେଳେ ତାର ଭଲ ଚିନ୍ତା କରେ
ଶୁଭ ସେ ମନାସୁ ଥାଏ
ସାଥୀ ପାଇଁ ତାର ଜୀବନ ଦେବାକୁ
ବାଜି ବି ଲଗେଇ ଦିଏ ।
ଅଭାବ ଅନଟନ ବୁଝି ସେ ପାରଇ
ମନକୁ ବୁଝେଇ ଦିଏ
କଣ୍ଟକିତ ଅବା ଫୁଲ ହେଉ ପଥ
ସାଥେ ରହି ଚାଲୁଥାଏ ।
ଅସୁସ୍ଥ ବେଳରେ ପାଖେ ଜଗି ବସି
ସେବାଟି କରୁ ସେ ଥାଏ
ତାହାରି ଭିତରେ ସନେହ ମମତା
ପରଶ ସେ ଦେଇଯାଏ ।
ନୀଳକଣ୍ଠ ପରି ହସି ହସି ସିଏ
ସବୁ ଦୁଃଖ ପିଇ ଯାଏ
ସାଥୀଟି ହେଇ ହସି ସେ ହସେଇ
ନିଜେ ବି ତ ହସୁଥାଏ ।
ଯେତେ ଅପମାନ ଆଘାତ କଲେବି
କେବେ ସେ ଛାଡ଼ି ନ ଯାଏ
କେତେ ପୁଣ୍ୟ ତପ ବଳେ ଏମିତିକା
ସାଥୀଟି ଯେ ମିଳିଥାଏ ।
ସାଥୀ ବିନା ଏଇ ଜୀବନଟି ସତେ
ଅଧୁରା ଯେ ଲାଗିଥାଏ
ସାଥୀଟିଏ ଯଦି ମିଳିଯାଏ ତାକୁ
ଦୁଃଖ ଟି ଲାଘବ ହୁଏ ।
ସେଇ ସାଥୀ ମିଛ ଧୋକାବାଜ୍ ଯଦି
ସଇତାନୀଟି ନ ଥାଏ
ବିଶ୍ବାସଘାତକ ବେଇମାନୀ ହେଲେ
କଷ୍ଟ ଦ୍ବିଗୁଣିତ ହୁଏ ।
ସାଥୀଟି ମିଳିବା ସହଜ ହେଲେ ଏ
ମନଲାଖି ସାଥୀଟିଏ
ମିଳିବା ଟା ଏଇ ମିଛ ଦୁନିଆରେ
ଦୁଃସ୍ବପ୍ନ ପାଲଟି ଯାଏ ।
ଦୁଃଖ କହି ଦେଲେ ଦୁଃଖ ତ ସରେନି
ମନଟି ହାଲକା ହୁଏ
ମନ କଥା କହିବାକୁ ମନ ଖୋଜେ
ସେମିତିକା ସାଥୀଟିଏ ।
