ସାଥୀ

ମାନବ ହେଉକି ଯେକୌଣସି ପ୍ରାଣୀ 

ସାଙ୍ଗ ସାଥୀ ନେଇ ରହେ,

ନିଃସଙ୍ଗ ଜୀବନ ସଭିଙ୍କର ପାଇଁ 

କଷ୍ଟକର ହୋଇଥାଏ l

 ସାଥୀଟିଏ ଆମ ବାଡିଟିଏ ପରି 

ସାହସ ତା' ଯୋଗୁଁ ମିଳେ,

ବିପଦ ଆପଦେ ସାହା ମିଳିଥାଏ

ଜୀବନ ପରିଧି କାଳେ l

ବାଲ୍ୟସାଥୀ ମେଳେ ବାଲ୍ୟ ବୟସଟି

କଟିଯାଏ ଖେଳି ବୁଲି,

ଯୌବନ କାଳରେ ଜୀବନ ସାଥୀଙ୍କ 

ସ୍ନେହ ପ୍ରେମ ନୁହେଁ ଭୁଲି l

ପ୍ରଭୁ ରାମଙ୍କର ବିପଦ ବେଳରେ

ସୁଗ୍ରୀବ ଯେ ସାଥୀ ହେଲେ,

ଦୁହେଁ ଦୁହିଁଙ୍କର ବିପଦ ବେଳରେ

ସହାୟତା କରିଥିଲେ l

ଦରିଦ୍ର ବ୍ରାହ୍ମଣ ସୁଦାମା ପାଇଲେ

 ସଖା କୃଷ୍ଣଙ୍କ ସାନିଧ୍ୟ,

ଭୋକିଲା ବନ୍ଧୁମହାନ୍ତିଙ୍କୁ ଦେଲେ 

ନିଜେ ଜଗନ୍ନାଥ ଖାଦ୍ୟ l

ପୁରାଣର ଠାରୁ ଇତିହାସ ଯାଏ

ମିତ ବଳେ ବଳୀୟାନ,

ହୋଇଛନ୍ତି କେତେ ଦୃଷ୍ଟାନ୍ତ ରହିଛି

କେତେ ରାଜା ଗରୀୟାନ l

ଜୀବନର ସବୁ ସମୟରେ ସାଥୀ

ମନରେ ଦିଅନ୍ତି ବଳ,

ବୟସର ଶେଷେ ପ୍ରଭୁ ଏକା ସାଥୀ

ଆମର ଶେଷ ସମ୍ବଳ l