ସାଥି ତୁମେ ଫେରିବକି

ନିଦ ଭାଙ୍ଗିବାର ନୂଆ ଉପାୟ ବାହାର କରିଛି

ପ୍ରିୟା ଏବେ ସପନରେ ପାଉଁଜି ପିନ୍ଧି ଆସୁଛି

ଶୀତରେ ଆସୁଛି ପବନରେ ମିଶି

ଚାଦର ଭିତରେ ପଶୁଛି

ଥରିଲା ଦେହକୁ ଆହୁରି ଥରେଇ 

ହସିଦେଇ ବହିଯାଉଛି

ଆହୁରି ଥଣ୍ଡା ତା ଓଠ ସ୍ପର୍ଶ

ଜ୍ବରରେ ପକେଇ ଯାଇଛି

ନିଦ ଭାଙ୍ଗିବାର ନୂଆ ଉପାୟ ବାହାର କରିଛି

ପ୍ରିୟାକୁ କହିଲି ସନ୍ଧ୍ୟାରେ ଆସ 

ମୁଁ ରାତିର ଚାନ୍ଦ ଆଣିବି

ଆକାଶ ବୁକୁରୁ ମନ ଲୋଭା ତାରା 

ତୁମ ଲାଗି ବାଛି ଦେବି

ସେ କାହିଁ ବୁଝିବ ଅମାନିଆ ପକ୍ଷୀ

ଦେହଗଞ୍ଜ କରି ଯାଉଛି

କେଉଁ ଜ୍ବରରେ ପକେଇଯାଇଛି

ବୈଦ ଔଷଧ ହାରିଛି

ଚିଡେଇବାର ନୂଆ ଉପାୟ ଖୋଜି ଆଣିଛି

ମୁଁ ପୁଣି କହିଲି 

ତୁମେ ଭରା ଦ୍ବିପହରେ ଆସ

ମୁଁ ସନ୍ଧ୍ୟାର ଛାଇ ଆଣିବି

କିଛି ସଞ୍ଚିଥିବା ସମୟ 

ସବୁ ତୁମ ପାପୁଲିରେ ଦେବି

ଗାଁର ମଝିରେ ଗଛ ଉହାଡରେ

ଗୋପନରେ କଥା ହେବି

ପ୍ରେମ ପାଉଁଜିରେ ଭାବର ଝୁମୁକା

ପାଦ ମଞ୍ଜୀରେ ଦେବି

ତୁମ ମଥାର ଅଲରା କେଶକୁ

କଇଁ ଫୁଲେ ଭରି ଦେବି

ବାଡି ବରକୋଳି କିଛି ତୁମ ପାଇଁ 

ମୁଣିରେ ଲୁଚେଇ ଥିବି

କିଛି ପ୍ରଶ୍ନ ଆଉ କିଛିଟା ଉତ୍ତର

କର୍ଣ୍ଣ କୁଣ୍ଡଳରେ ଦେବି

କାନ୍ଧରେ ତୁମର ହାତ ରଖିଦେଇ

ଛାତିରେ ଆଉଜି ନେବି

ସନ୍ଧ୍ୟା ଆସୁଛି ଫେରିବାକୁ ହେବ

ଯିବା ଅନୁମତି ଦେବି

ଯିବା ସମୟରେ ଏତିକି କହିବି

ସାଥି ତୁମେ ପୁଣି ଫେରିବକି ।