ସାନଶଳା
ସାନଶଳା
ଶାଶୁ ଶଶୁରଙ୍କ ଅଲିଅଳି ଝିଅ
ବାହାହେଇ ଘରକୁ ମୋ ଆସିଲା
ସାଙ୍ଗରେ ଆଶ୍ରମ ମିରିଗ ଭଳିଆ
ସାନଭାଇଟାକୁ ସାଥେ ଆଣିଲା।। ୧
ଭାରି ବଦମାସ ସେ ମେଞ୍ଚଡ ଟୋକା
ଟିଙ୍କ ଭଳି ଥାଏ ନାନୀ ସାଥିରେ
ଯେବେ କଥାହୁଏ ତା ନାନୀ ସାଥିରେ
ପାଖରେ ଥାଇକି ଗଳା ଖଙ୍କାରେ।। ୨
ମାଳିକୁ ଯେମିତି ଛେଳିଟା ଅଡ଼ୁଆ
ଶଳା ଟୋକା ଭାରି ଅଡ଼ୁଆ କଲା
ଘରଣୀ ମୁହଁକୁ ଚାହିଁକି ଶଳାର
ଅତ୍ୟାଚାର ସହିବାକୁ ପଡିଲା।। ୩
ଛୋଟମୋଟ କିଛି ଦରକାରୀ ଚିଜ
ଆଣିବାକୁ ଯଦି ଶଳାକୁ କୁହେ
ଚକୋଲେଟ୍ ଅବା ଆଉ କିଛି ଗୋଟେ
ଲାଞ୍ଚ ସେ ଟୋକାଟା ନିଶ୍ଚୟ ନିଏ।। ୪
ଭାରିଯା ପାଇଁକି ସାନ ଶଳାଟାକୁ
କହି ପାରେନାହିଁ କିଛି ବି ହେଲେ
ସେଇଥିପାଇଁ ସେ ମେଞ୍ଚଡ ଟୋକାଟା
ମୁଣ୍ଡରେ ମୋହର ଚଢିକି ବୁଲେ।। ୫
ପାଠଶାଠ ନାହିଁ ହେଣ୍ଡିମାରି ଖାଲି
ବାତରା ହେଇକି ସାହି ବୁଲଇ
ଭାବିଲି ଦିନେ ମୁଁ ଶଳା ଟୋକାଟାକୁ
ଭଲକରି ପାନେ ଦେବି ଚଖେଇ।। ୬
ପାଞ୍ଚଟି ଗଣିତ କରିବାକୁ ଦେଲି
ଭାବିଲି ଶଳାଟା ବୁଦ୍ଧି ଶିଖିବ
କିଏ ଜାଣିଥିଲା ମାନେ ବହି ଦେଖି
ଦଶ ମିନିଟରେ ଦେଖେଇଦେବ।। ୭
ମନେ ମନେ ଭାରି ବିରକ୍ତ ଲାଗିଲା
ଭାବିଲି ମେଞ୍ଚଡ ହରେଇଦେଲା
ରଚନା ଦେଲି ମୁଁ ନଦୀବଢି ତାକୁ
ଖାତା ଧରି ସିଏ ଲେଖି ବସିଲା।। ୮
ଘଣ୍ଟାଟିଏ ଗଲା ଲେଖା ନ ସରିଲା
ଭାବିଲି ଟୋକାଟା ଭଲ ପଢୁଛି
ସେଥିପାଇଁ ବୋଧେ ମୁଣ୍ଡକୁ ତାହାର
ଲେଖିବାକୁ ବହୁ କଥା ଜୁଟୁଛି।। ୯
କେତେବେଳକରେ ଦେଖେଇଲା ମତେ
ରଚନା ଆଣିକି ଭାରିଯା ଭାଇ
ନଦୀବଢି କଥା ଆରମ୍ଭ କରିଛି
ଗାଈ ରଚନାରେ ସାରିଛି ଯାଇ।। ୧୦
ଜାଣିଲି ଏ ଟୋକା ପାଠ ପଢିବନି
ବଡ ହେଲେ ଟାଉଟରୀ କରିବ
ରାଜନୀତି କରି ପେଟ ତା ପୋଷିବ
ନହେଲେ ମିଛରେ ଡିଗ୍ରୀ କରିବ।। ୧୧