ସାମ୍ରାଜ୍ଯ

ରାଜା ମହାରାଜା ରାଜ ସିଂହାସନେ

ଅଭିଷିକ୍ତ ହେବାପରେ ।

ସାମ୍ରାଜ୍ଯ ବିସ୍ତାର ଲାଳସା ରଖନ୍ତି

ଦେଖ ଅତୀତ ପୃଷ୍ଠାରେ ।୧।

ନିଜ ସେନାପତି ସୈନିକ ସାମନ୍ତ

ଦଳବଳ ସହ ଯାଇ ।

ଦିଗ୍ ବିଜୟ କରି ଫେରି ଆସୁଥିଲେ

ବିଜୟ ନାଗରା ବାଇ ।୨।

ଧନ ରତ୍ନ ଆୟ ଅଳଙ୍କାର ସବୁ

ହାତୀ ଘୋଡା ପୃଷ୍ଠେ ବହି ।

ଘେନି ଆସୁଥିଲେ ଶତ୍ରୁରାଇଜରୁ

ନିଜ ସାମ୍ରାଜ୍ଯ ବଢାଇ ।୩।

ସାମ୍ରାଜ୍ଯ ବିସ୍ତାର ହେବାପରେ

ତାକୁ ରଖୁଥିଲେ ସୁରକ୍ଷିତ ।

ସୁରକ୍ଷା ପାଇଁକି ରାଜକର୍ମଚାରୀ

ହେଉଥିଲେ ନିୟୋଜିତ  ।୪।

ରାଜା ରାଜୁଡାଙ୍କ ସାମ୍ରାଜ୍ଯ ବିସ୍ତାର

ହୋଇଥାଏ ଏକ ନିଶା ।

ସମ୍ରାଜ୍ୟ ପାଇଁକି ହସ୍ତିିନାପୁୁରରେ

ଚାଲିଲା କପଟ ପଶା ।୫।

କେତେ ଯେ ସାମ୍ରାଜ୍ଯ ଗଠନ ହୋଇଛି

ଇୟତ୍ତା ତାହାର ନାହିଁ ।

କାଳର ବକ୍ଷରେ ହୋଇଅଛି ଲୀନ

ଆଜି ତାର ସତ୍ତା ନାହିଁ ।୬।

ନାହାନ୍ତି ସେ ରାଜା ନାହାନ୍ତି ସେ ପ୍ରଜା

ନାହିଁ ଆଜି ସେ ସାମ୍ରାଜ୍ଯ ।

ସେ ସ୍ଥାନରେ ଆଜି ଗଠିତ ହୋଇଛି

କେତେ ନୂଆ ଦେଶ ରାଜ୍ଯ। ୭।

କାହିଁ ରାଜତନ୍ତ୍ର କାହିଁ ଗଣତନ୍ତ୍ର

କାହିଁ କେ ଶାସନ କଲେ ।

ନୂଆ ସାମ୍ରାଜ୍ଯର ଗଠନ ହୋଇଲେ

ନୂଆ ରାଜନୀତି ଚାଲେ ।୮।

ସାମ୍ରାଜ୍ଯ ପତନ ସାମ୍ରାଜ୍ଯ ଗଠନ

ଚକ୍ରବତ ଚାଲିଥାଏ ।

ସୁନ୍ଦର ସାମ୍ରାଜ୍ଯ କାଳର ବକ୍ଷରେ

ସ୍ବର୍ଣ୍ଣାକ୍ଷରେ ଲେଖାଥାଏ ।୯।