ସାକ୍ଷୀ ରହିବ ସାମ୍ପ୍ରଦାୟିକ ବିଷ

ହେଉ ସେଇ ମଣିଷ, ବିଦ୍ବାନ, ଜ୍ଞାନୀ ଓ 

ଅଧିକାରୀ ବହୁ ପ୍ରତିଭାର 

ନାହିଁ ମଣିଷ ମଣିଆ, ଯଦି ବିଷ ଫଳ ବୁଣେ, 

ତା ଜୀବନ ଅଟେ ବେକାର |୧|

ହାଡ଼ ମାଉଁସରେ ନୁହେଁ ଖାଲି ଗଢ଼ା, ଆତ୍ମା 

ପରା ଅଛି ମଣିଷ ଭିତର

ଅଜର ହୁଏ ସେହି ମଣିଷ, ଉଜଳି ଦିଏ 

ଯେ ରଶ୍ମି ମହାନ୍ ଆତ୍ମାର |୨|

ଶାନ୍ତି ସତ୍ୟ ପୀରତି ଏ ତିନି, ହୋଇଲେ 

ଠୁଳ ଏକ ଆଧାରରେ 

ମହା ମହୀୟାନ ବିଜୟର ସ୍ତମ୍ଭ ତୋଳି 

ଦେବ ସାରା ଦୁନିଆରେ |୩|

ସାରା ବିଶ୍ବ ଆଜି ଥରିଯାଏ ସାମ୍ପ୍ରଦାୟିକ 

ଜାତିବାଦ ଆତଙ୍କ ଭୟରେ

ମୁଖ ମଣ୍ଡଳ ମଳିନ ପଡି଼ଛି, ଅଶ୍ରୁ ବହେ 

ସାଧାରଣ ମଣିଷ, ରହେ ଅସହାୟରେ |୪|

ମାସ କାର୍ତ୍ତିକ, ଗାଉଛ ଭାଗବତ, ଡିବି 

ଡିବି ଡେଙ୍ଗୁରା ପିଟିବା କି' ଲୋଡ଼ା ?

ଅମାସିଆ ଅନ୍ଧାରକୁ ଲୁଚେଇଲେ କଣ ସେ' 

ଲୁଚେ କଲେ କାର୍ତ୍ତିକ ମାହାତ୍ମ୍ୟ ପଢା ?? |୫|

ସନ୍ଦେହର ବିଷ, ଏମିତି ଉତ୍କଟ, ଥରେ 

ମନେ ଯଦି ତାହା ପଶି ଯାଏ,

ଜାଣିନକି, ସତର୍କ ନହେଲେ ମନ ଓ 

ପ୍ରାଣକୁ ଅବିଳମ୍ବେ ଖାଇ ଦିଏ ?? |୬|

ନାୟକ ସାଜିଛ, ଅଭିନୟ କର, ଭାଷଣ

ଦେଉଛ ଦେଶପ୍ରେମର

କିପରି ନଜାଣୁଛ, ଝଡ ବି ଆସିବ ବତାସ 

ଆସିବ, ନାହିଁ କିଆଁ ଲାଗୁନି ଡର |୭|

ମହ ମହ ମହକୁଥିବା, ମଧୁମାଳତୀ ଭର୍ତ୍ତି

ଅଗନା ଅଗନୀ ବନସ୍ତକୁ

ସାମ୍ପ୍ରଦାୟିକ ଜାତିବାଦ ନାମେ ଭୋଟ ଓ

ନିଜ ପଦବୀ ପାଇଁ ଧ୍ୱଂସ କର ଦେଶକୁ |୮|

 

କାହିଁକି ସାଜୁଛ ବଇରୀ, ମଣିଷ ମଣିଷ 

ସମ୍ପର୍କ ଭିତରେ ଭରୁଛ ବିଷ

ଭାବୁଛ ଯାହାକୁ ନିଜର, ସ୍ବାର୍ଥ ସରିଲେ ହେବେ 

ସାତପର, ନିଃଶ୍ୱାସକୁ ତ ନାହିଁ ବିଶ୍ୱାସ |୯|

ହୋଇପାରେ କିଏ ଆଗ, କିଏ ପଛ, ତୁମ 

ନାଟକ ସରିଲେ ସମସ୍ତେ ହେବେ ଧ୍ୱଂସ 

ତୁମ କର୍ମ ନେଇ ଆମେ ସରବେ ଭୋଗିବା 

ଏଇଠି ସାକ୍ଷୀ ରହିବ ସାମ୍ପ୍ରଦାୟିକ ବିଷ |୧୦|

ଅଧର୍ମୀର ମାୟା ଜାଲରେ ଛନ୍ଦି ହୋଇଗଲା 

ପରେ ଭାବିଲେ କି କଅଣ ହେବ

ମିଛ ସ୍ବପ୍ନ ଦେଖି, ଭଲ‌ କାରିଗର ଭାବି, କରିଛେ 

ତ ଆମେ ହର ହର ମହାଦେବ |୧୧|