ସାକ୍ଷୀ ଅଛି ମୁଖଶାଳା

ସପ୍ତାଶ୍ଚର୍ଯ୍ୟ ମଧ୍ୟେ ସ୍ଥାନ ପାଇଅଛି 

ସାକ୍ଷୀ ଅଛି ମୁଖଶାଳା ,

ବୁଝିଛି କେ' ଅବା ଯନ୍ତ୍ରଣା ତାହାର

ସେ ଏକ ନିର୍ଜୀବ ଶିଳା ।୧।

ନିହାଣ ମୁନରେ କେତେ କଷ୍ଟ ସହି

ପ୍ରୀତି ସ୍ପର୍ଶ ଆଙ୍କିଥିଲେ ,

ଜରାଜୀର୍ଣ୍ଣ ହୋଇ କୋଣାର୍କ କାନ୍ଦୁଛି

ମରଣ ଦୁଆର ତଳେ ।୨।

ଧରମାର କଷ୍ଟ ଧୋଇ ହୋଇଗଲା

ଚନ୍ଦ୍ରଭାଗା ଗଣ୍ଡ ଜଳେ ,

ଶତ କଳପନା ନିରାଶ ହୋଇଛି

ରାଜନୀତି ଆଜି ଖେଳେ ।୩।

ଇଂରେଜ ତ' ଯାହା ଭାଙ୍ଗି ଦେଇଗଲେ

ସେଦିନ ଯାଇଛି ବିତି ,

ଫମ୍ପା ଅନୁକମ୍ପା ଶତସୁର ଆଜି

ପାଲଟିଛି ରାଜନୀତି ।୪।

ହେ ଉତ୍କଳବାସୀ ହୁଅହେ ଜାଗ୍ରତ

କରୁଅଛି ନିବେଦନ ,

ଦୂରକର ଏହି ଶସ୍ତା ରାଜନୀତି

ଯୋଡ଼ ହେ' ସହସ୍ର ମନ ।୫।

ସାଥି ସହଚର ସାଥେ ସାଥେ ନେଇ

ଗଢ଼ କୋଣାରକ ନବ ,

ଯୁଗ ଯୁଗ ପାଇଁ ସ୍ମୃତି ରହିଯାଉ

ଉତ୍କଳର ଗଉରବ ।୬।

ଶ୍ରୀହୀନା କୋଣାର୍କ ସଜାଇ ଦିଅହେ

କର ନାହିଁ ଆଉ ଡେରି ,

ଜୀବନ୍ତ କରହେ ନିହାଣ ମୁନରେ

କୋଣାର୍କର ଶିଳା ଶିରୀ ।୭।

ଉତ୍କଳ ବିନ୍ଧାଣୀ କୋଣାର୍କର ସାଥି

ଉଠାଅ ତୁମ ନିହାଣ ,

କାଳର ଗରଭେ ବିଲୀନ କୋଣାର୍କ

କର ନବ ଉଦ୍ଧାରଣ ।୮।