ସାଜିଲ ମନ ମୟୂରୀ

ସତେକି  ମିଳିଲା ଇନ୍ଦ୍ରର  ଆସନ

ସ୍ୱର୍ଗସୁଖ ହେଲା ପ୍ରାପ୍ତି

କେଉଁ ଜନମର ପୁଣ୍ୟଫଳ ବୋଧେ

ଅପେକ୍ଷାର ହେଲା ଇତି ।।

ବିନ୍ଧାଣିର ତୁମେ ନିଆରା ସୃଷ୍ଟି ଗୋ

ସାଜିଲ ମନ ମୟୂରୀ

ଲାଜିତ ବଦନେ ମୃଦୁହସ ତୁମ

ହୃଦୟ କରିଲା ଚୋରୀ ।।

ନବ ପଲ୍ଲବିତ ତରୁଟିଏ ତୁମେ

ଏ ଦେହ ମରୁଭୂମିରେ

ଜୀବନ ସଙ୍ଗିନୀ ରୂପେ ଆସି ତୁମେ

ବାନ୍ଧିଦେଲ ବନ୍ଧନରେ ।।

ତାରାଫୁଲ ଆଣି ଉପହାର ଦେବି

ଗଜରା କରିବ ତୁମେ

ସୁନେଲି ଆଭାକୁ  ସିନ୍ଦୂର କରିବ

ଝଲସିବ ମିଠାପ୍ରେମେ ।।

ସବୁରାତି ହେବ ମଧୁଚନ୍ଦ୍ରିକା ଗୋ

ମହକିବ ମଲ୍ଲୀବାସ

ନିରେଖି ନିରେଖି ଦେଖି ମୁଁ ତୁମକୁ

ସରିଯିବ ଏ ବୟସ ।।