ସାହିତ୍ୟ ଓ ସମାଜ

ସାହିତ୍ୟ ଅଟଇ ସମାଜ ଦର୍ପଣ

କହେ ସମାଜର କଥା 

ସମାଜର ହିତ ସାଧନ ନିମିତ୍ତ

ଦିଏ ସୁଚିନ୍ତିତ ବାର୍ତ୍ତା l

ଆମ ସଂସ୍କୃତି ଦର୍ଶନ ଓ ବିଜ୍ଞାନ

ସାହିତ୍ୟେ ପ୍ରତିଫଳିତ 

ସାହିତ୍ୟ ସୁନ୍ଦର ନିତ୍ୟ ନୂତନ

ପ୍ରବାହ ମାନ ତା ସ୍ରୋତ l

ସାହିତ୍ୟର ଭାବ ସଞ୍ଚରି ଯାଏ

ପାଠକ ହୃଦୟ କୋଣେ 

ସୁରଭିତ କରେ ସାରା ବିଶ୍ୱକୁ

ନିଜର ସୌରଭ ଦାନେ l

 ରେବତୀ ଗଳ୍ପ ନାରୀ ଶିକ୍ଷା ପାଇଁ

ପ୍ରେରଣାର ବାର୍ତ୍ତା ଥିଲା 

କନ୍ୟା ସୁନା ମଧ୍ୟ ଯୌତୁକଲୋଭୀଙ୍କ 

ବିରୁଦ୍ଧରେ କହିଥିଲା l

ମଧୁବାବୁଙ୍କର କବିତା ଆମର

ଭାଷାକୁ ଆଗେଇନେଲା 

ବିଶ୍ୱ ଦରବାରେ ଓଡ଼ିଆ ଭାଷାର

ସମ୍ମାନ ବଢ଼ାଇଦେଲା l

ବୀରକିଶୋର ଲେଖିଲେ କବିତା

ସ୍ୱାଧୀନତା ବହ୍ନି ଜାଳି 

 କବି ଗାଳ୍ପିକ ଆଉ ଉପନ୍ୟାସିକ

ଲେଖିଥାନ୍ତି କେତେ ଭାଳି l

ସାହିତ୍ୟ ତତାଏ ସାହିତ୍ୟ ମତାଏ

ମନୋରଞ୍ଜନ ରେ ଭରା 

ସଂସ୍କାର ଆଣେ ଜୀଇଁବା ଶିଖାଏ

ପ୍ରେମର ଅମୃତ ଧାରା l

ସାହିତ୍ୟକୁ ଏତେ ଶସ୍ତା ଭାବ ନାହିଁ

ଯତନରେ ସୃଷ୍ଟି କର 

ବାଗଦେବୀଙ୍କର ଆଶିଷ ବଳରେ

ଲେଖାକୁ ସୁଦୃଢ କର l