ସାଗର ସମ୍ଭବା
ସାଗର ସମ୍ଭବା
ଅମୃତ ଲାଭ ଲାଳସେ ମିଳି ଦେବାସୁର l
ଖୁଆ ଦଣ୍ଡ ମନ୍ଦରରେ ମନ୍ଥିଲେ ସାଗର ll
ବାସୁକୀ ନାଗ ରଜ୍ଜୁକୁ ବେନି ପାଶେ ଧରି l
ବୁଲାନ୍ତେ ଜଳେ ବୁଡ଼ିଲା ସେ ମନ୍ଦରଗିରି ll
ସ୍ୱୟଂ ନାରାୟଣ କୂର୍ମ ଅବତାର ଧରି l
ପୃଷ୍ଠରେ ଧରିଲେ ତୋଳି ସେହି ମହାଗିରି ll
ଅମୃତ ଶୁଭ ବେଳାରେ ଶୁଭ ଲଗ୍ନ ବେଳେ l
ଲକ୍ଷ୍ମୀ ଉଠିଲେ ମନ୍ଥନୁ ସେହି ମହାଜଳେ ll
ସୁବର୍ଣ୍ଣ କାନ୍ତି ଝଟକେ ଚୌଦିଗେ ପ୍ରସରି l
ପ୍ରତୀତ ଲାଗଇ ଯଥା ଜୀମୂତେ ବିଜୁଳି ll
ରତ୍ନ ସିଂହାସନ ଦେଲେ ଦେବରାଜ ଆଣି l
ତହିଁରେ ବିଜୟ କଲେ ମାତା କମଳିନୀ ll
ମୁନିଏ ମିଳିଲେ ତୀର୍ଥ ଜଳ କୁମ୍ଭେ ଭରି l
ବନ୍ଦନା କରିଲେ ବେଦ ମନ୍ତ୍ରକୁ ଉଚ୍ଚାରି ll
ବେନି ଗଜରାଜ ପୁଣ୍ଡରୀକ ଐରାବତେ l
ସ୍ବର୍ଣ୍ଣ କୂମ୍ଭୁ ଜଳ ବରଷନ୍ତି ଥୋର ହସ୍ତେ ll
ଗନ୍ଧର୍ବେ ଗାଵନ୍ତି ଗୀତ ନାଚନ୍ତି ଅପ୍ସରା l
ପ୍ରଣବ ଓଁକାର ନାଦେ ଉଛୁଳିଲା ଧରା ll
ନାନା ରତ୍ନ ଅଳଙ୍କାରେ କମଳା ଶୋଭିତ l
ଦେଵଗଣ ମିଳିଦେଲେ ଯେ ଯାହା ଉଚିତ l
ରୁଣୁ ଝୁଣୁ ନାଦରେ ଗମନ ଜନମାତା l
କମଳା ବିଳାସୀ କମଳିନୀ ହେମଲତା ll
ଚରଣରେ ଦେଇ ମନ ଗମିଲେ କମଳା l
ଗୋବିନ୍ଦଙ୍କ ଗଳେ ଲମ୍ବାଇଲେ ରତ୍ନମାଳା ll
ବିଷ୍ଣୁଙ୍କ କୋଳେ ବସିଲେ ଯାଇ ଜନମାତା l
ଯେ ମାତା ଅଟନ୍ତି ଜୀବ ଜୀବନର ଦାତା ll
ଲକ୍ଷ୍ମୀ ନାରାୟଣ ଦେଖି ଚନ୍ଦ୍ର ମୁଖ ବେନି l
ଦେବତା ହର୍ଷ ସନ୍ତୋଷ ଲଭିଲା ମେଦିନୀ ll