ସାଧନା

ସାଧନାର ବଳେ ସିଦ୍ଧି ଲାଭ ମିଳେ

କହିଥାନ୍ତି ସାଧୁଜନ,

 ସେଥିପାଇଁ ଯୋଗୀ ଘର ଦ୍ୱାର ତ୍ୟାଗି

ଖୋଜନ୍ତି ନିରୋଳା ସ୍ଥାନ l

ରାଜପୁତ୍ର ହୋଇ ସିଦ୍ଧାର୍ଥ ଛାଡିଲେ

ପତ୍ନୀ ପୁତ୍ରଙ୍କର ସ୍ନେହ,

ନିରଞ୍ଜନା ତଟେ ଧ୍ୟାନରେ ବସିଲେ

ଛାଡି ସଂସାରର ମୋହ l

ମାନବର ଚାରି ଅବସ୍ଥାକୁ ଦେଖି

ମନ ତାଙ୍କ ହେଲା ଧନ୍ଦି l

କପିଳାବାସ୍ତୁର ଭାବୀ ରାଜପଦ

ପାରିଲାନି ତାଙ୍କୁ ବାନ୍ଧି l

ସାଧନା ବଳରେ ଜ୍ଞାନ ଲାଭ କଲେ 

ବୁଦ୍ଧ ଭାବେ ହେଲେ ଜଣା,

ସାଧନାର ଜ୍ଞାନ ବାଣ୍ଟିଲେ ଜଗତେ

ପାଇ ସେ ଦିବ୍ୟ କରୁଣା l

ସାଧନା ବଳରେ ଦଶ୍ୟୁ ରତ୍ନାକର

ଓଲଟାଇ ରାମ ଡାକି,

ବାଲ୍ମୀକି ଭାବରେ ହେଲେ ପରିଚିତ

ରାମାୟଣ ଗ୍ରନ୍ଥ ଲେଖି l

ସାଧନାର ମାର୍ଗ କଷ୍ଟ ହୋଇଲେବି

ଅଭ୍ୟାସ ତା' ନିରନ୍ତର,

ବ୍ୟାୟାମ ହେଉ ବା କୁସ୍ତି କସରତ

ଜୀବନର ଏ ବେଭାର l

ଲଗାତାର ଭାବେ ଅଭ୍ୟାସ କରିବା

ସାଧନାର ଅନ୍ୟ ନାମ,

ଧ୍ରୁବ, ପ୍ରହ୍ଲାଦ ତାହାରି ବଳରେ

କଲେ ଈଶ୍ୱର ଦର୍ଶନ l

ସର୍ବ ସାଧନାର ଏକ ମାତ୍ର ସିଦ୍ଧି

ଅଟନ୍ତି ପରମେଶ୍ୱର,

ତାଙ୍କ କୃପା ବଳେ ସାଧକ ଜୀବନେ

ଘଟିଥାଏ ରୂପାନ୍ତର l

ବିଦ୍ୟା ହେଉ ଅବା ଯେକୌଣସି କର୍ମ 

ନିଷ୍ଠା ଓ ସାଧନା ବଳେ,

ଜୀବନରେ ଦିନେ ସଫଳତା ମିଳେ 

ଦୃଢତା ମନରେ ଥିଲେ l

ଶରୀର ହେଉ ବା ମନର ସାଧନା

ଜୀବନରେ ନିତ୍ୟ ଆଣି,

ଜୀବନକୁ ଆମେ ସଫଳ କରିବା

ମହା ମନିଷୀଙ୍କ ବାଣୀ l