ସାବଧାନ ହୋଇ ସବୁ ଦେଖୁଥା
ସାବଧାନ ହୋଇ ସବୁ ଦେଖୁଥା
ସଳଖ ସୁନ୍ଦର ଭେଣ୍ଡିଆଟେ ଦିନେ
ପଶିଗଲା ଆସି ଦୋକାନ ଘରେ
ଭଳି ଭଳି ଚିଜ ଦେଖିଲା ଆଗ୍ରହେ
କିଣି ନେବ ବୋଲି ବୀର ଦର୍ପରେ l
ଚାରି ଆଡ଼କୁ ସେ ଚାହିଁଲା ସନ୍ତର୍ପେ
କାହା ଦୃଷ୍ଟି ତାରେ ଅଛି କି ନାହିଁ
ହଠାତ ଦୋକାନ ଟଙ୍କା ବାକ୍ସରୁ
ନୋଟ ଥୋଡେ ଧରି ଗଲାସେ କାହିଁ l
ଦୋକାନୀ ବାପୁଡ଼ା ଧର ଧର ବୋଲି
ଯେତେ ପାଟିକଲା ପଛରେ ଧାଇଁ
ଲୁଚିଗଲା ସେତ ଜନ ଗହଳିରେ
ଖୋଜି ଖୋଜି ତାକୁ ପାଇଲା ନାହିଁ l
ଶେଷେ ବାଧ୍ୟ ହୋଇ ପୁଲିସ ଥାନାରେ
ଏତଲା ଲେଖିଲା ଘଟଣା କହି
ପୁଲିସ ଅଧିକାରୀ ସି ସି ଟିଭି ଯେତେ
ଅଣ୍ଡାଳିଲେ ସେଠି ସଂଭ୍ରମେ ଯାଇ l
ଚେହେରାଟି ତାର ସରସ ସୁନ୍ଦର
ଚିହ୍ନିଲା ତାହାକୁ ପୁଲିସ ଭାଇ
ପେଷାଦାର ଚୋର ଅଟେ ସହରର
ମୂଲ୍ୟବାନ ତାର ପୋଷାକ କହି l
ଭଦ୍ର ଲୋକ ଭଳି ବଜାରରେ ଗଳି
ନିତି ସେ କରଇ ଚୋରି ଚପଟ
ବାନ୍ଧି ଆଣି ତାକୁ ହାଜତେ ରଖିଲେ
ଫରୱାର୍ଡ କଲେ ତଳ କୋର୍ଟ l
ପାଇଲା ଦଣ୍ଡ ସେ ବିଚାର ସରିଲା
ଦଶ ବର୍ଷ ଖଟି ସଶ୍ରମ ଦଣ୍ଡ
ଅଭ୍ୟାସଟା ଯେବେ ବଦଳି ତା' ଯିବ
ଭଲ ଲୋକେ ଗଣା ହେବ ତା'ମୁଣ୍ଡ l
ଏଇତ ଆଜିର ଦୁନିଆଁର କଥା
ସାବଧାନ ହୋଇ ସବୁ ଦେଖୁଥା
କେତେବେଳେ କିଏ କେଉଁ ରୂପେ ଆସି
ଲୁଟିନେବ ସବୁ ଘୁରିବ ମଥା l
ଅପରାଧ ଯିଏ କରୁଥିବ ନିତି
ସିଏ କି ପାଇବ ସମ୍ମାନ କେବେ
ସମାଜରେ ଆମେ ଜନମ ଲଭିଛେ
ସାମାଜିକ ପ୍ରାଣୀ ହେବାରେ ଗର୍ବେ l