ସ୍ୱୟଂ ସଂପୂର୍ଣ୍ଣା

ଏକ ଅବକ୍ଷୟମାନ ସଭ୍ୟତାର

ଛାତି ଉପରେ ସେ ଆଜି ଦଣ୍ଡାୟମାନ 

ନିଜ ଅସ୍ମିତା ସହ କରି ସାଲିସ୍ ବାରବାର

ହେଲେ ସେଇ ଏକମାତ୍ର ଯୋଗସୂତ୍ର 

ପୁରୁଣା ଆଉ ନୂଆ ଭିତରର ।

ସେ ଚାହିଁଲେ ନୀଳ ଆକାଶରୁ

ଛଡାଇ ଆଣି ପାରେ ଅମୃତର ଦୁଇଧାର

ପୁଣି ଆଗ୍ନେୟଗିରି ଭିତରୁ

ତରଳ ଅଗ୍ନି ଆଞୁଳା ଆଞୁଳା

ବଢାଇ ଦେଇପାରେ ସବୁ ସଂପର୍କର ସ୍ଥିତିସ୍ତାପକତା ।

ଦୋଳାୟମାନ ପେଣ୍ଡୁଲମ ଭଳି

ଝୁଲି ଚାଲିଥାଏ ଏରୁଣ୍ଡିର

ଏପଟ ଆଉ ସେପଟ ଦୁନିଆ ଭିତରେ

କେହି କେବେ ମାପନ୍ତିନି ତା'ର ଅନ୍ତରର ଗଭୀରତା

ଆଉ ପଢନ୍ତିନି ଆଖିର ନିରବତା ।

ଲୋଡା ନାହିଁ ତା'ର 

କାହାରି ମିଥ୍ୟା ସମ୍ବେଦନଶୀଳତା

ସେ ସ୍ୱୟଂସମ୍ପୂର୍ଣ୍ଣା 

କବଳିତ କରିପାରେ ନା ତାକୁ ଆଧୁନିକ ଯାନ୍ତ୍ରିକତା

ବିଧ୍ୱସ୍ତ ପୃଥିବୀର ଚିତ୍ର ଆଣିଦେଇ ପାରେ ତା'ର ଜଡତା ।