ସ୍ୱପ୍ନର ମହଲ

ସ୍ୱପ୍ନର ମହଲ ଏକ ବନେଇଥିଲି

ନିଦକୁ ଭୁଲେଇ ଅନେଇଥିଲି ।

ତୁମେ ଆସୁଥିଲ ଶେଷ ପହରକୁ

ତୁମ ନିରବ ଚାଲିକୁ କାନେଇଥିଲି ।

ତୁମେ ଆସୁ ଆସୁ ଫେରି ଯାଅ ଯେବେ

ମୁହଁ ଘୋଡେଇ ନିଦକୁ ଅନେଇଥିଲି ।

ତୁମ କମ୍ପିତ ଅଧର ଅଧା ଖୋଲା

କିଛି କହିବ ଭାବି ମୁଁ କାନେଇ ଥିଲି ।

ତୁମ ଲାଜ ଟି ବି ବଡ଼ ଅଲାଜୁକୀ

ଅସଜଡ଼ା ସରମକୁ ଅନେଇଥିଲି ।

ଖସି ଯାଉଥିଲା ଅଙ୍ଗୁ ବାସ ଯେବେ

ବ୍ୟସ୍ତ ବିରକ୍ତ ସ୍ୱରକୁ କାନେଇଥିଲି ।

ଖେଳେଇ ମୁକୁଳା କେଶ ପୁଣି ଗୁଚ୍ଛାକରି

ଖୋସୁ ଥିଲ ଖୋସା ମୁଁ ଅନେଇଥିଲି ।

ଯାଉଯାଉ ଆଉ କିଛି କହିବ କି

ପ୍ରୀତି କାତର କାନେ କାନେଇଥିଲି ।

କବାଟ ଖୋଲି ଦର-ଆଉଜା ଛାଡ଼ି

ତୁମେ ଚାଲିଗଲ ମୁଁ ଅନେଇଥିଲି ।