ସ୍ୱପ୍ନ ସୁନ୍ଦରୀ

କିଏ ଚୋରିକଲା ଆଶାର କିରଣ

କାକର ବିନ୍ଦୁରୁ ମୋତି

କିଏ ଆଙ୍କିଦେଲା ମାଟିର ଦେହରେ

ଜହ୍ନ ଆଲୁଅର ଝୋଟି I

ଆଖିରେ ଲେପିଛି ସପନର ରଙ୍ଗ

ଓଠରେ ତୁମରି ନାମ

ତୁମ କଣ୍ଠସ୍ୱର କାନରେ ବାଜିଲେ

ଛାତିତଳେ ଭରେ ପ୍ରେମ I

ସପନରେ ତୁମ ଆସ ନିତି ନିତି

ଆଖି ତଳେ ଯାଅ ବସି

ଅଶାନ୍ତ ପରାଣ ଶାନ୍ତ ହୋଇଯାଏ

ତୁମେ ଦେଲେ ଟିକେ ହସି I

ସପନରେ ତୁମେ ସପନ ସୁନ୍ଦରୀ

ଜାଗ୍ରତେ ନୀଳପରୀ

ତୁମେ ସଖୀ ମୋର ଅନ୍ଧାର ବାଟରେ

ଆଲୋକ ଦେଇଛ ଭରି I

ସପନରେ ତୁମେ ଆସିଗଲେ ସଖୀ

ସପନେ ଯାଏ ମୁଁ ଶୋଇ

ତୁମେ ଟିକେ ସ୍ୱପ୍ନ ଦେଖିବା ଆଗରୁ

ରାତି ଯାଏ ପାହି ପାହି I

ତୁମ ପାଇଁ ସଖୀ ରଙ୍ଗ ମାଖେ ଆଖି

ଦିନରେ ସପନ ଦେଖେ

ତୁମ ଘନ କେଶ ଅନ୍ଧାର ରାତିରେ

ପ୍ରେମକାବ୍ୟଟିଏ ଲେଖେ I