Library
Profile
ସ୍ୱାଧୀନତା
ସ୍ୱାଧୀନତା
ସ୍ୱାଧୀନତା ସ୍ୱାଧୀନତା ଠାରୁ ଆନନ୍ଦ କିଛି ସଂସାରେ ନାହିଁ
ବନ୍ଧନରେ ମନ ବିଷର୍ଣ୍ଣ ମୁକ୍ତି ଆନନ୍ଦଦାୟୀ |
ଖୁଣ୍ଟରୁ ଫିଟିଲେ ଗୋରୁଏ ଲଭିଥାନ୍ତି ଆନନ୍ଦ
ପଞ୍ଜୁରୀ ଭିତରୁ ଖସିଲେ ପକ୍ଷୀ ପରମାନନ୍ଦ |
ବିଦ୍ୟାଳୟ ଛୁଟି ହୋଇଲେ ପିଲେ ହରସ ମନ
ଖେଳପରେ ହୋନ୍ତି ବିରସ ବେଳ ହେଲେ ଟ୍ୟୁସନ |
ସ୍ୱାଧୀନେ ମଣିଷ ଜନମ କିନ୍ତୁ ବନ୍ଧା ଜଞ୍ଜାଳେ
ପରିବାରେ ହୁଏ ବନ୍ଧିତ ସମାଜର ଶୃଙ୍ଖଳେ |
ପରାଧୀନ ହେଲେ ଜୀବନ ହୋଇଯାଏ ଅସାର
ଦେଶ ଜାତି ପରାଧୀନରେ ଦୁର୍ଦ୍ଦଶାଟି ଅପାର |
ଆମ ଏ ଭାରତ ବରଷ ଥିଲା ବ୍ରିଟିଶାଧୀନ
ଦୁଇଶହ ବର୍ଷ ଆମକୁ କରିଲେ ସେ ଶାସନ |
ବୋହି ଧନ ଆମ ଦେଶରୁ ଖୋଳ କଲେ ସର୍ବସ୍ୱ
ବେଠି ବେଗାରୀରେ ଖଟାଇ ଶୋଷି କରିଲେ ନିସ୍ବ |
ବନ୍ଧୁକ ଚାବୁକ ପ୍ରହାରି କରୁଥିଲେ ଶାସନ
ସବୁ ଅତ୍ୟାଚାର ନୀରବେ କରୁଥିଲେ ସହନ |
ଗାନ୍ଧିଜୀ ନେତାଜୀ ଡାକରେ କମ୍ପେ ଭାରତ ଭୂଇଁ
ଆକୁମାରୀ ହିମାଚଳରେ ବହେ ବିପ୍ଳବ ନଈ |
ଜାତୀୟତା ବାଦୀ କବିଏ ଗୀତେ ଦେଲେ ତତାଇ
କଲମ ସାଜିଲା ବଲମ ଆନ୍ଦୋଳନ ବଢ଼ାଇ |
ବାଧ୍ୟ ହୋଇ ଗୋରା ଛାଡ଼ିଲେ ଦେଶ ହେଲା ସ୍ୱାଧୀନ
ଗଣତନ୍ତ୍ର ଦେଶେ ଚାଲିଲା ଆସିଗଲା ସୁଦିନ |
ତ୍ରିରଙ୍ଗା ପତାକା ଉଡିଲା ମୁକ୍ତ ହେଲା ଭାରତ
ସ୍ୱାଧୀନତା ମଣି ରକ୍ଷଣେ ସର୍ବେ ନେବା ଶପଥ ||
