ସ୍ୱାଧୀନତା ପରେ
ସ୍ୱାଧୀନତା ପରେ
ଇତିହାସେ କେତେ କଳଙ୍କ କାଳିମା
ରକତରେ ଲେଖା କେତେ,
ହଜି ଯେ ଯାଇଛି ଅତୀତ ଗର୍ଭରେ
କାହାଣୀ ହୋଇଛି ଯେତେ |
ଇତିହାସ କହେ ଭାରତବର୍ଷ ଯେ
ଯେବେ ପରାଧୀନ ଥିଲା,
ଇଂରେଜ ଶାସକ ଶାସନ ଆଳରେ
ଭାରତକୁ ଶୋଷୁଥିଲା |
ଶାସନେ କ୍ରୂରତା ହିଂସା ବିଭୀଷିକା
କେତେ କେତେ କଳାପାଣି,
ବିନା ଅପରାଧେ ନିର୍ମମ କଷଣ
ନାହିଁ ପ୍ରତିବାଦ ବାଣୀ |
ଅସହ୍ୟ ହେବାରୁ ଭାରତ ସନ୍ତାନେ
ଯେବେ ଗର୍ଜି ଉଠିଥିଲେ,
ଥରହର ହେଲା ଇଂରେଜ ଶାସକ
ଦମନ କରି ଚାଲିଲେ |
ସ୍ୱାଧୀନତା ପାଇଁ ସଂଗ୍ରାମ ଚାଲିଲା
ଦିନେ ନୁହେଁ ଶହ ବର୍ଷ,
କେତେ ଯେ ମରଣ ଦେଖିଛି ଏ ଦେଶ
ସାକ୍ଷୀଅଛି ଇତିହାସ |
ସ୍ୱାଧୀନତା ଯୁଦ୍ଧେ ଥିଲା ଦୁଇସ୍ରୋତ
ନେତୃବୃନ୍ଦେ ମତଭେଦ,
ସlମ୍ୟବାଦ ଥିଲା ଗୋଟିଏ ସ୍ରୋତରେ
ଅନ୍ୟ ସ୍ରୋତେ ପୁଞ୍ଜିବାଦ |
ସେଥିପାଇଁ ବୀର ଭଗତ ସିଂହ ଯେ
ଫାଶୀଖୁଣ୍ଟେ ଝୁଲିଥିଲେ,
ନେତାଜୀ ସୁଭାଷ ଜାତୀୟ କଂଗ୍ରେସ
ତ୍ୟାଗ କରି ଦେଇଥିଲେ |
ଆହ୍ୱାନ ଦେଲେ ସେ ସ୍ୱାଧୀନତା ଦେବି
ମୋତେ ତୁମେ ରକ୍ତ ଦିଅ,
ଭିକ୍ଷାରେ ମିଳେନା କେବେ ସ୍ୱାଧୀନତା
ତରବାରୀ ତୋଳି ନିଅ |
ସବୁ ବୃଥା ହେଲା ପୁଞ୍ଜିପତି ହାତେ
ରହିଗଲା ସ୍ୱାଧୀନତା,
ଦୁଇଖଣ୍ଡ ହେଲା ଭାରତ ମାଟିଟା
ସବୁହେଲା ସ୍ଵାର୍ଥେ ବନ୍ଧା |
ବିଦେଶୀ ବଣିକ ପରାଧୀନ ବେଳେ
ଯେଉଁ ନୀତି ବାଛିଥିଲା,
ସ୍ୱାଧୀନତା ପରେ ସ୍ୱଦେଶୀ ବଣିକ
ସେଇ ପଥ ଆଚରିଲା |
ଆଇନ ଚାଲିଛି ଆଇନ ବାଟରେ
ଏଠି ସତ ମିଛ ହୁଏ,
ପ୍ରମାଣ ଅଭାବେ ହତ୍ୟାକାରୀ ଏଠି
ନିର୍ଦୋଷରେ ଖସିଯାଏ |
ବ୍ୟଭିଚାର ଆଜି ବଢ଼ି ଯେ ଚାଲିଛି
ମାଦକ ବେପାର ଚାଲେ,
ପ୍ରତିବାଦ ଆଜି କରିବା ଲୋକ ଯେ.
କିଛି ଵୁଝି ନପାରିଲେ |
ତଥାପି ଭରସା ରହିଛି ମନରେ
ଆସିବ ଯେ ସ୍ୱାଧୀନତା,
ଇତିହାସ କହେ ପରିବର୍ତ୍ତନର
ରହିଛି ନିରନ୍ତରତା |
ଡୁବିଛି ଅତୀତେ ରାଜାର ରାଜତ୍ୱ
କେତେ ଯୁଦ୍ଧ ଅହମିକା,
ଫ୍ରାନ୍ସ ରୁଷ ଭଳି ଦେଶ ବଦଳିଛି
ଇତିହାସେ ଅଛି ଲେଖା |