ଋତୁ ରାଜ ବର୍ଷା

      

ଆଷାଢ଼ ଶ୍ରାବଣ ମାସ ପ୍ରବେଶ

         ବରଷାରେ ଧରା ଜଳ ଅଶେଷ l

ଦେଖ କାଦମ୍ବିନୀ ନୀଳ ଅମ୍ବରେ

           ଧରି କଳସକୁ କଟି ଦେଶରେ l

ସୂରଜ ଚନ୍ଦ୍ରମା କରଇ ଗ୍ରାସ

            ଢାଲିଛି ଅମ୍ବରୁ ଅମୃତ ରସ l

ପ୍ରାଣୀଙ୍କ ଆରତ ଥିଲା ଦୁର୍ଦ୍ଦଶା

          ହଟେ ରୁଦ୍ର ତାପ ଅନଳ ବର୍ଷା l

ସରସୀ ଭରିଛି ବରଷା ଜଳେ

          ମଣ୍ଡୁକ ଗରଜେ ଆସିଣ କୂଳେ l

ଦେଖେ ନୀଳକଇଁ ସରସୀ ଜଳେ

         ରହିଥାଏ ସେତ କମଳ ମେଳେ l

ଫୁଲେ ଫୁଲେ ଅଳି କରେ ଭ୍ରମଣ

          ସରସୀ ଜଳରେ କରେ ରମଣ l

ବିଜୁଳି ବରଷା କରେ ଗର୍ଜ୍ଜନ

           ଶୁଭେ ଘଡ ଘଡି ଛନକା ମନ l

ଚାଷୀ ଚାହିଁଥିଲା ଚାତକ ହୋଇ 

          ହଳ ଲଙ୍ଗଳରେ ଚାଷିଲା ଭୂଇଁ l

ବରଷା କଷଣ କେତେ ଯେ ଦଣ୍ଡ

         ଦେଶ ପାଇଁ ସଦା ସେ ମେରୁଦଣ୍ଡ l

ଧରିତ୍ରୀ ହୋଇଲା ସବୁଜ ରାଣୀ

          ଶସ୍ୟ ଭରିଦେଇ କରିଲା ଋଣୀ l

ସବୁଜ ଧରାରେ ସାଧବ ବୋହୁ

         ନାଲି ଟୁକୁ ଟୁକୁ ଆଗେ ଦେଖଉ l

କରିଛି ତା ସଙ୍ଗେ ଅନେକ ଖେଳ

          ଏବେ ଦିଶୁନାହିଁ ତାଙ୍କର ମେଳ l

ଦେଖେ ଖଦ୍ୟୋତିକା ହୁଏନି ଗଣି

         ଅମା ଅନ୍ଧକାର କରେ ରୋଷଣି l

ପାଠେ ଲାଗେ ନାହିଁ ପିଲାଙ୍କ ମନ

         ଗାଆଁ ଦାଣ୍ଡେ ପାଣି କରେ ଉଛନ l

କାଗଜ ଡ଼ଙ୍ଗାରେ ଆସଇ ମାଡି 

          ପାଣିରେ ଛାଡ଼ିଛି ଧାଡି କି ଧାଡି l

ବିହଙ୍ଗ ନୀଡ଼ରେ ଶାବକ ରଡି

          ରଖିଛି ଶାବକେ ଡେଣାକୁ ଭିଡି l

ବିହଙ୍ଗମ ନୀଡ଼ ଆଜି ଶ୍ରୀହୀନ

         ଝଡ ବରଷାରେ ହାରେ ଜୀବନ l

ଦୀନ ହୀନ ଜନ ବାସ ବିହୀନ

           ଭିଜା ବସନରେ କାଟଇ ଦିନ l

ପଥିକ ଜଳରେ ପାଏନି ବାଟ

          ଭୋଗିଥାଏ ସିଏ ଅନେକ ହଟ l

ପଥିକ ବାଟୁଆ ପଥରେ ପଡି

         କେବେ ଯାଇଅଛି ଜୀବତ ଛାଡି l

ସୁଖ ଦୁଃଖ ଦିଏ ବରଷା ରାଣୀ

          ବିରହେ ଭରିଛି ଆଖିରେ ପାଣି l

ବରଷା କାଳତ ମଙ୍ଗଳକାରୀ 

           ପାଳଇ ଆମକୁ ବରଷି ବାରି l

ସ୍ମୃତି ଅନୁଭୂତି କରି ବାଖ୍ୟାଣ

         ଷ୍ଟୋରୀ ମିରରରେ କଲି ଅର୍ପଣ