ରଥରେ ଜଗନ୍ନାଥ

ତିନୋଟି ରଥରେ ବିଜେ କରିଛନ୍ତି

ପ୍ରଭୁ ଚତୁର୍ଦ୍ଧାମୂରତି

କି ଅପୂର୍ବ ସୋଭା ଦେଖି ମନଲୋଭା

ମାନବୀୟ ରୀତିନୀତି ।

 

ବରଷକ ଥରେ ଶ୍ରୀଗୁଣ୍ଡିଚା ଜାତ 

ଭକ୍ତଙ୍କ ଦର୍ଶନ ପାଇଁ 

ଓଲ୍ଲାଇ ଆସନ୍ତି ରତନ ବେଦୀରୁ 

ଦେବୀ ଓ ଜଗତସାଇଁ ।

ମାଉସୀ ମନ୍ଦିର ଯାଇ ସେ ଫେରିବେ

ନଅ ଦିନ ରହି କରି

ମାନବ ଦେବତା ମାନବୀୟ ଲୀଳା 

ଅପୂର୍ବ ଏ ସୁଖ ଶିରି ।

ଭାଇ ଭଉଣୀଙ୍କୁ ସାଙ୍ଗରେ ନେଇ 

ଯାଉଛନ୍ତି ଜଗନ୍ନାଥ

ହରିବୋଲ ହୁଳହୁଳି ଶବଦରେ 

ବଡଦାଣ୍ଡ ପ୍ରକମ୍ପିତ ।

ଜୟ ଜଗନ୍ନାଥ ଜୟ ବଳଭଦ୍ର 

ଜୟ ମାଁ ସୁଭଦ୍ରା ଦେବୀ

ଘଣ୍ଟ ବାଇଦରେ ଉଛୁଳି ପଡୁଛି 

ସବୁଠି ପ୍ରଭୁଙ୍କ ଛବି ।

ଭକ୍ତ ଭଗବାନ ମିଳନ ଏଠି

ସବୁପୁଣି ଏକାକାର

ଚତୁର୍ଦିଗ ଦିଶେ ଜଗନ୍ନାଥମୟ

ପରିବେଶ ଭାବ ଭକ୍ତିର ।

ରଥର ଦଉଡି ଟାଣି କିଏ ପୁଣି 

ଖୁସିରେ ହୁଅନ୍ତି ବିଭୋର

କିଏ ରଥଟିକୁ ଛୁଇଁ ଦେଇ କହେ 

ଜଗନ୍ନାଥ ରକ୍ଷାକର ।

ରୋଗୀ ଯୋଗୀ ଭୋଗୀ ସଭିଏଁ ସମାନ

ଏହି ରଥ ଯାତ୍ରାରେ 

ପାତର ଅନ୍ତର ନାହିଁ ଭେଦ ଭାବ

 ସମସ୍ତେ ସେବକ ଏଠାରେ ।

 

ସୁଖ ବାଣ୍ଟିବାକୁ ଆସିଛନ୍ତି ପ୍ରଭୁ 

ଲୀଳାମୟ ଲୀଳା କରି

ଚମତ୍କାର ଲୀଳା କରୁଛନ୍ତି ପରା

ଭକ୍ତଙ୍କ ସାଙ୍ଗରେ ହରି ।

ଜଗନ୍ନାଥତତ୍ତ୍ଵ ବିଶ୍ଵରେ ବିଖ୍ୟାତ  

ଅଦ୍ଵିତୀୟ ରୂପଧାରୀ

ଯେମିତି ରୂପରେ ଭକ୍ତ ଚାହୁଁଛନ୍ତି 

ଦିଶେ ପୁଣି ସେହିପରି ।

 

ଜଗତରନାଥ ଜଗତକରତା

ଭକ୍ତକୁ ଦିଅନ୍ତି ଚାହିଁ

ରଥଯାତ୍ରାଟି ହେଉଛି କେବଳ

ଭକ୍ତଙ୍କ ଶରଧା ପାଇଁ ।

 

 ମାନ ଅଭିମାନ ତ୍ୟାଗ କରିଦେଇ 

 ଭକ୍ତଟିଏ ହୋଇଯିବା

 ଜୟ ଜଗନ୍ନାଥ କହିବା ସର୍ବଦା 

 ପ୍ରଭୁନାମ ଘୋଷୁଥିବା ।

 

ପ୍ରଭୁଙ୍କର କୃପା ଅମୂଲ୍ୟ ସ୍ଵରୂପା

ମାନବ ଜୀବନ ପାଇଁ

ଧନ୍ୟ ହେଇଯିବ ଏଶ୍ରେଷ୍ଠ ଜୀବନ 

ସେ କୃପା ଟିକକ ପାଇ ।