ରସପୂର୍ଣ୍ଣ ସାହିତ୍ୟ

ସୁମଧୁର ସଙ୍ଗୀତର ସୃଜନ କରନ୍ତି ସପ୍ତସୁର,

ଗୀତ ଗେୟର ସୃଷ୍ଟି କରନ୍ତି ଅଳଙ୍କୃତ ଅକ୍ଷର,

ଲାବଣ୍ୟ ଲାସ୍ୟ ରୂପାନ୍ତରିତ କରନ୍ତି ନୂପୁର,

ବାଦ୍ୟଯନ୍ତ୍ର ସାଜନ୍ତି ଶ୍ରାବ୍ୟ ନାଦର ସମାହାର ।

ରମ୍ୟ ଗଦ୍ୟ ଉପନ୍ୟାସ ଲେଖନ୍ତି ଲିପିକାର,

ଗଳ୍ପ କଥା-ସରିତାର ପ୍ରବାହ କରନ୍ତି କଥାକାର,

ସରସ ସୁରସ କାବ୍ୟ ଭାବନ୍ତି ଇଚ୍ଛିତ କାବ୍ୟକାର,

ସାହିତ୍ୟର ସାରାଂଶ ସାରଭାଗ ହୁଅନ୍ତି ଗ୍ରନ୍ଥକାର ।

ତରୁଣ ଅରୁଣ ସର୍ବତ୍ର ବ୍ୟାପ୍ତ କରନ୍ତି ସ୍ବର୍ଣ୍ଣକିରଣ,

ଚାରୁ ପୂର୍ଣ୍ଣଚନ୍ଦ୍ର ପ୍ରସାରଣ କରନ୍ତି ରୌପ୍ୟକିରଣ,

ସହନଶୀଳ ପୃଥିବୀରେ କାୟା କରନ୍ତି ପ୍ରାଣଧାରଣ,

ଅନ୍ତଃକରଣରୁ ବିବେକୀ ବାଣ୍ଟନ୍ତି ବିଶୁଦ୍ଧ ଜ୍ଞାନକିରଣ ।

କାମ୍ୟ କାବ୍ୟଶାସ୍ତ୍ରରୁ ହୁଏ ଭାଷାର ଭରଣ-ପୋଷଣ,

ଗ୍ରନ୍ଥାବଳି ହୁଏ ସମକାଳୀନ ବିଦ୍ଵତ୍ତାର ନ୍ୟାଯ୍ୟ ଦର୍ପଣ,

ମହାକାବ୍ୟ କରନ୍ତି ସଭ୍ୟ ସଂସ୍କୃତିର ରକ୍ଷଣ ସଂରକ୍ଷଣ,

ରସପୂର୍ଣ୍ଣ ସାହିତ୍ୟ ସଂଘ ସମାଜ ହେତୁ ସତତ ଆଶାକିରଣ |