ରଜ ଦୋଳି ଗୀତ

ବନସ୍ତେ ଡାକିଲା ଗଜ ବରଷକେ ଥରେ ଆସିଛି ରଜ

ଆସିଛି ରଜ ଲୋ, ହେବା ଆସ ସଜବାଜ l

ଗ୍ରୀଷ୍ମ ଆସେ ସରି ସରି, ରଜ ଅଟେ ଗଣ ପର୍ବ ଆମରି

ପର୍ବ ଆମରି ଲୋ, କେ ଦେଶେ ନାହିଁ ଏପରି l

ମା ଆମ ମାତୃଭୂମି, ରଜସ୍ୱଳା ହୁଏ ଧରଣୀ ରାଣୀ

ଧରଣୀ ରାଣୀ ଲୋ, ଶସ୍ୟ ଉପୁଜାଏ ପୁଣି l

ମଉସୁମୀ ଆଗମନେ , ଆକାଶୁ ବରଷା ଅସରା ଝରେ

ଅସରା ଝରେ ଲୋ, ଧରା ସବୁଜିମା ଭରେ l

କୂଅରେ ପଡିଲା ଗରା, ସବୁଜ ସୁନ୍ଦର ଆମରି ଧରା

ଆମରି ଧରା ଲୋ, ମାତୃଭୂମି ମାଆ ପରା l

ବାଉଁଶ ପତର ସରୁ, ବଣକୁ ସୁନ୍ଦର ଗହଳ ତରୁ

ଗହଳ ତରୁ ଲୋ, ଶୋଭା ଦିଶୁଥାଏ ଦୂରୁ l

ପାଚିଲା ବେଲର ବାସ, ଗଛ ଲଗାଇବା ସଭିଏଁ ଆସ l

ସଭିଏଁ ଆସ ଲୋ, ସୁସ୍ଥ ହେଉ ପରିବେଶ l

ଦୋଳି ହୁଏ କଟ ମଟ, ନିଜ ସ୍ୱାର୍ଥ ପାଇଁ ଗଛ ନ କାଟ l

ଗଛ ନ କାଟ ଲୋ, ଅମ୍ଳଜାନ ହେବ ଶେଷ l

ନଈରେ ଖେଳୁଛି ମୀନ, ବେଳୁ ବେଳ ଖରା ହେଉଛି ଟାଣ

ହେଉଛି ଟାଣ ଲୋ, ଜଳ ବିନା ଯିବ ପ୍ରାଣ l

ଗାଈ ଦେଲା ହମ୍ବା ରଡି,ଗଛ ଲଗାଇବା ଧାଡି କୁ ଧାଡି

ଧାଡିକୁ ଧାଡି ଲୋ, ଅମ୍ଳଜାନ ଯିବ ବଢ଼ି l

ଗଛରୁ ଝଡିଲା ବେଲ, ପରିବେଶ ସଙ୍ଗେ ଜମା ନ ଖେଳ

ଜମା ନ ଖେଳ ଲୋ, ଭଲ ରୁ ହୋଇବ ଭେଲ l

ଆମ ବେଳ ସରିଯିବ, ପରବର୍ତ୍ତୀ ପିଢୀ କଷ୍ଟ ପାଇବ,

କଷ୍ଟ ପାଇବ ଲୋ, ବାୟୁ , ଜଳ ନ ମିଳିବ l