ରଜ ଦୋଳି ଡାକୁଛି

ସାତ ଦରିଆ ସେ ପାରି ରେ

ମୋ ଗାଁ ର ଆମ୍ବତୋଟା ଛାଇ ତଳେ

ଝୁଲୁଛି ରଜଦୋଳି

କେଁ କଟର କେଁ କଟର।

ହାତ ଠାରି ଡାକୁଛନ୍ତି 

ତା ସାଥିରେ ତାଳ ଦେଇ

ମୋ' ଗୋଲାପ, ପାଦୁକ, ଅଭଡା......

ଯେତେ ସବୁ ସଖୀ।

ରଙ୍ଗବେରଙ୍ଗୀ ଶାଢୀରେ ସଜେଇ

ସତେକି ଚିତ୍ରିତ ପ୍ରଜାପତି

ଡେଣା ମେଲି ମନଖୋଲି ଘୁରୁଛନ୍ତି

ତୋଟା ରୁ ବନ୍ଧ, ବନ୍ଧ ରୁ ଗାଁ ଦାଣ୍ଡ ଯାଏଁ।

କଣେଇ ଚାହିଁଲି ଟିକେ

ଅଧା ଆକାଶ ଉଚ୍ଚରେ ହଲୁଛି ତାଳପତ୍ର,

ଉହାଡରୁ ହସୁଛି ବାଇଚଢେଇ,

ମୋ ବେବଶୀ ବୋଳା ସ୍ମିତହାସ ରେ।

ଫେରିଆସିଲି ମୋ ଦୁନିଆକୁ

ହ୍ବାଟସ୍ ଆପ୍ ଭିଡିଓ ରୁ

ସାଉଁଟିଲି ଦୋଳି ର ପୁଲକ,

ଅବୁଝା ମନକୁ ବୁଝେଇ

ଜଣାଇଲି ଶୁଭରାତ୍ରୀ

ରଜ ପର୍ବ- ମତୁଆଲା ସାଥି ଙ୍କୁ ମୋର।