ରହିଛ ଚିର ଅମ୍ଳାନ
ରହିଛ ଚିର ଅମ୍ଳାନ
ଆଜି ପୁଣ୍ୟ ତିଥି ଦେଉଅଛି ଭେଟି
ଶତ ଶତ ପ୍ରଣିପାତ
ଉତ୍କଳ ମାତାର ସ୍ୱାଭିମାନ ତୁମେ
ଅସ୍ମିତାରେ ଅଭିପ୍ରେତ l
ଜନମ ଲଭିଲ ସିଦ୍ଧେଶ୍ୱର ପୁରେ
ଅଠରଶ ଚୌସ୍ତରିରେ
ମାତୃଭାଷା ପାଇଁ ମନ ପ୍ରାଣ ଦେଇ
ଧନ୍ୟ ହେଲ ଏ ଉତ୍କଳେ l
ସାଧନା ତୁମର ସାରସ୍ୱତ ବୀର
ପ୍ରତି ଓଡ଼ିଆଙ୍କ ପ୍ରାଣେ
ରଖିଗଲ ଛାପ ବାଣୀ ଭଣ୍ଡାରରେ
'ଭାଗବତ ଟୁଙ୍ଗିରେ ସନ୍ଧ୍ୟା' ନାମେ l
'ବାଇ ମହାନ୍ତି ପାଞ୍ଜି' ହେଉ ଅବା
'ଦୁନିଆର ହାଲଚାଲ '
'ନନାଙ୍କ ବସ୍ତାନି ' 'ଢଗ ଢମାଳି'ରେ
କେତେ ତଥ୍ୟ ସଂରଚିଲ l
"ପୂର୍ଣ୍ଣଚନ୍ଦ୍ର ଭାଷା କୋଷ" ରଚିଦେଲ
ବହୁ ବାଧା ବିଘ୍ନ ସହି
ଗୋପାଳ ଚନ୍ଦ୍ର ପ୍ରହରାଜ ନାମେ
କାନେ କାନେ ଦେଲ କାହି l
ଏକ ଲକ୍ଷ ପୁଣି ପଞ୍ଚାସୀ ହଜାର
ଶବ୍ଦରେ ଶ୍ରୀବୃଦ୍ଧି ହେଲା
ନ'ହଜାର ପାଞ୍ଚଶ' ପୃଷ୍ଠା ସମ୍ବଳିତ
ସାତ ଖଣ୍ଡେ ବିରାଜିଲା l
ସର୍ବ ଶ୍ରେଷ୍ଠ କୃତି ମାଆ ମାଟି ପ୍ରୀତି
କାଳ କାଳ ଥିବ ରହି
ଗାଏ ଇତିହାସ ତୁମ ଅଭିଳାଷ
ଚିର ଜାଗରିତ ହୋଇ l
ତୁମ କର ସ୍ପର୍ଶେ ଉତ୍କଳ ସାହିତ୍ୟ
ଗର୍ବେ ତୋଳି ଦେଲା ଶିର
'ରାସ ଚକ୍ର' ଅବା 'ନବ ଭାରତ'ରେ
ଦେଲ 'ସତ୍ୟ ସମାଚାର' l
ଅନେକ ଭାଷାରେ ରଖିଲ ଦକ୍ଷତା
ମାତୃଭାଷା ଟେକ ସାଥେ
ବକ୍ତବ୍ୟ ପ୍ରଦାନେ ମନ୍ତ୍ର ମୁଗ୍ଧ କଲ
ସାରସ୍ୱତ ଏ ଜଗତେ l
ଉଣେଇଶି ଶହ ପଇଁଚାଳିଶିର
ମଇ ମାସ ଶେଷ ଦିନ
ଇହଧାମ ତ୍ୟାଗକରି ମଧ୍ୟ ତୁମେ
ରହିଛ ଚିର ଅମ୍ଳାନ l
ତୁମ ସୃଷ୍ଟି ରାଜି ଗାଉଛି ଏ ମାଟି
ଧନ୍ୟ ସିଦ୍ଧେଶ୍ୱର ପୁର
ଧନ୍ୟ ପ୍ରହରାଜ ଧନ୍ୟ ତୁମ କାର୍ଯ୍ୟ
ଜନ୍ମନିଅ ବାରମ୍ବାର l
ତୁମ ପଦରେଣୁ ପାଦୁକା ସମାନ
ମସ୍ତକରେ ବହି ଆମେ
ସ୍ମୃତି ଅର୍ଘ୍ୟ ବାଢ଼ି ଦେଉଛୁ ଅଞ୍ଜଳି
ଦେଖୁଥାଅ ସ୍ୱର୍ଗ ଧାମେ l