ରଘୁନାଥ ସ୍ମରଣେ
ରଘୁନାଥ ସ୍ମରଣେ
ନିହାଣ ସ୍ପର୍ଶରେ ପ୍ରସ୍ତର ଖଣ୍ଡରେ
ଭରି ଦେଉଥିଲ ପ୍ରାଣ
ପ୍ରିୟ ରଘୁନାଥ ଭାସ୍କର୍ଯ୍ୟ ଶିଳ୍ପରେ
ଥିଲ ତୁମେ ସୁନିପୁଣ ।
ଭୁବନେଶ୍ୱରର ବିମାନ ବନ୍ଦରେ
ଷୋହଳ ଅଶୋକ ଚକ୍ର
ଧଉଳିର ବୌଦ୍ଧ ବାରବାଟି ଘୋଡ଼ା
କୀର୍ତ୍ତି ଅମର ଭାସ୍କର ।
ସଂସଦ ଭବନ ପାଞ୍ଚ ଫୁଟ ଉଚ୍ଚ
ସୂର୍ଯ୍ୟ ନାରାୟଣ ମୂର୍ତ୍ତି
ତାରା ଓ ତାରିଣୀ ଭବ୍ୟ ମନ୍ଦିରର
ତୁମେ ହିଁ ମୁଖ୍ୟ ସ୍ଥପତି ।
ସୁଦୂର ଲଦାଖ ଫ୍ରାନ୍ସ ଜାପାନରେ
କାଷ୍ଠ ପାଷାଣର ବୁଦ୍ଧ
ଦିଶେ ସମୁଜ୍ଜ୍ୱଳ ପନ୍ଦର ଫୁଟର
ଉଚ୍ଚ ଅଶୋକଙ୍କ ସ୍ତମ୍ଭ ।
ଅଶୋକା ହୋଟେଲ ନୂଆଦିଲ୍ଲୀ ଠାରେ
କୋଣାର୍କ ବିରାଟ ଚକ୍ର
ରାଜୀବ ଗାନ୍ଧୀଙ୍କ ସମାଧି ପୀଠରେ
ଶିଳ୍ପ କଳା ଚମତ୍କାର ।
ଅମ୍ଳାନ ପ୍ରତିଭା ଥିଲ ରଘୁନାଥ
ପଦ୍ମଶ୍ରୀ ପଦ୍ମ ଭୂଷଣ
ଓଡ଼ିଶା ଲଳିତ କଳା ଏକାଡେମୀ
ସଭାପତି ପଦାସୀନ ।
ରାଜ୍ୟ ସଭା ପାଇଁ ମନୋନୀତ ସଭ୍ୟ
କାର୍ଯ୍ୟକାଳ ସମୟରେ
ପଦ୍ମ ବିଭୂଷଣ ହେଲ ସ୍ୱର୍ଗପ୍ରାପ୍ତ
କରୋନାରେ ଅକାଳରେ ।
ଶ୍ରଦ୍ଧାର ସୁମନ କରୁଛୁ ଅର୍ପଣ
ପାଅ ମୁକ୍ତି ସଦ ଗତି
ଗାଉ ଶିଳ୍ପ ଗ୍ରାମ ସ୍ଥାପତ୍ୟ ନୈପୁଣ୍ୟ
ରଖୁ ଯଶ ଖ୍ୟାତି କୀର୍ତ୍ତି ।