ରେ ମନ......ଏ ଜୀବନ ଅଢେଇ ଦିନ
ରେ ମନ......ଏ ଜୀବନ ଅଢେଇ ଦିନ
ରେ ମନ !
ଏ ଜୀବନ ଅଢେଇ ଦିନ ।
ଅଢେଇ ଦିନକୁ ବଡେଇ କରୁଛୁ
କେତେ ଦେଖୁଛୁ ସପନ।
ଦୁର୍ଲଭ ଅଟଇ ମାନବ ଜୀବନ
ଏ ଦେହ କ୍ଷଣ ଭଙ୍ଗୁର ।
ବୈକୁଣ୍ଠବାସୀଙ୍କି ପାଇବା ପାଇଁକି
ସତତ ଯତନ କର ।
ବିବେକ ବୈରାଗ୍ୟ ଜଗାଅ ତୋହର
ସାଧୁ ସଙ୍ଗ କର ନିତ୍ଯ ।
ଶ୍ରୀଗୁରୁ କୃପାରୁ ହରିଙ୍କି ଭେଟିବୁ
ଏ ଦେହ ତୋର ଅନିତ୍ୟ ।
ଅଭ୍ୟାସ ଯୋଗକୁ କରୁଥିବୁ ନିତି
ସୁପଥରେ ତୁ ଚାଲିବୁ ।
ରାମ କୃଷ୍ଣ ହରି ମୁଖେ ଗାଇ ଗାଇ
ଆନେ ହିଂସା ନକରିବୁ ।
ସମଦରଶୀ ତୁ ହୁଅ ମନ ମୋର
ପରନିନ୍ଦାରୁ ନିରତ ।
ରହିଥିବୁ ସଦା ହରିଭଜନରେ
ରହ ମନ ମୋର ରତ ।
ଆୟୁ ନାଶ ହୁଏ ପ୍ରତିକ୍ଷଣ ତୋର
ଯୌବନ ହୁଅଇ କ୍ଷୀଣ ।
କେଜାଣେ କେବେ ତୋ ସଉଦା ସରିବ
କାଳ ନେବ ତୋ ଜୀବନ ।
ସବୁ ସପନ ତୋ ଚୁନା ହୋଇଯିବ
ଭାଙ୍ଗିବ ତୋ ଟାଣ ପଣ ।
ମୋର ବୋଲ ମାନ ଶ୍ରୀଗୁରୁ ଚରଣେ
କର ଆତ୍ମସମର୍ପଣ ।