ରୌଦ୍ରତାପେ ଉତ୍ତପ୍ତ ଧରିତ୍ରୀ

ବିଚିତ୍ର ବ୍ରହ୍ମାଣ୍ଡ ତାରା ଖଣ୍ଡ ଖଣ୍ଡ 

ରବି ଆମର ନକ୍ଷେତ୍ର 

ଉଜ୍ଜ୍ୱଳ ଜ୍ୟୋତିଷ୍କ ରଶ୍ମି ତାର ଉଷ୍ମ

କମ୍ପଇ ତାପେ ସର୍ବତ୍ର l

ଘୂରଇ ଧରିତ୍ରୀ ବକ୍ଷେ ଧରି ସ୍ଥିତି

ଚକ୍ରକାରେ ଭାସ୍କରର

ପଶ୍ଚିମରୁ ପୂର୍ବ  ଅବିରତ ଭବ

ପାଶେ ଦୂରେ ଆଦିତ୍ୟର l

ନାହିଁ ଭେଦ ଭାବ  ଆଭାର ପ୍ରଭାବ

ସର୍ବଦା ଆଭା ସମାନ 

ପାଶେ ରୂପ ରୁଦ୍ର ଦୂରେ ଥିଲେ ଶୀତ

ଗ୍ରୀଷ୍ମେ ରାତ୍ର ହୁଏ ସାନ l

ପ୍ରଚଣ୍ଡ କିରଣ ଝାଞ୍ଜି ପ୍ରବାହନ

ରୌଦ୍ର ତାପେ ଧରା ଶୁଖେ

ଧରିତ୍ରୀ ଶ୍ରୀହୀନ ଜୀବ ହୀନିମାନ

ତ୍ରାହି ତ୍ରାହି ସର୍ବ ମୁଖେ l

ଦୁର୍ଲଭ ଜୀବନ ମାନବ ସନ୍ତାନ

ବର ପୁତ୍ର ଧରିତ୍ରୀର 

ସ୍ୱାର୍ଥରେ ପାଗଳ ଏଠି ସେହି ଖଳ

ନଷ୍ଟ ଭ୍ରଷ୍ଟ ପ୍ରକୃତିର l

ଜୀବ ବୃକ୍ଷ ଲତା ବିନାଶ କରତା

ପାହାଡ଼ ଜଙ୍ଗଲ ନାଶେ

ନଦୀ ଗତି ପଥ କରେ ଅବରୋଧ

ସୁନ୍ଦର ଧରିତ୍ରୀ ଧ୍ବଂସେ l

ଶିଳ୍ପ ଶସ୍ତ୍ର କଳ ପରମାଣୁ ବଳ

ଫୁଟା ଫୁଟି ପରୀକ୍ଷଣ

ପ୍ରଦୂଷଣ କାଳ ତାପ ମହାକାଳ

ପ୍ରାୟଶ୍ଚିତ ପ୍ରତିକ୍ଷଣ l

ଧରିତ୍ରୀ ଉତ୍ତପ୍ତ  ଠପ ଯାତାୟାତ

ପ୍ରାଣଘାତୀ ଅଂଶୁଘାତ

ପଥିକ ତୃଷାର୍ତ୍ତ ଜୀବ ଜନ୍ତୁ ସେତ 

ଜଳ ବିନା ମୃତାହତ l

ହେଜ ଚିନ୍ତାଶୀଳ ପ୍ରାଣୀଙ୍କ ବିକଳ

ଛାଡି ସବୁ ଟାଳଟୁଳ

ସବୁଜ ଉଦ୍ଭିଦ କାର୍ଯ୍ୟ ତ୍ୱରାନ୍ୱିତ

ବିଳମ୍ବରେ ଅସମ୍ଭାଳ l

ହେଵା ସଚେତନ କରି ଜାଗରଣ

ଧରିତ୍ରୀ ସେବାରେ ମନ

କୃତ୍ରିମତା ହତ ରୌଦ୍ର ହେବେ ଶାନ୍ତ

ନୃସିଂହର ନିବେଦନ ।