ରାମ ରାଇଜରେ ରାବଣ ପଲ

ରାମ ରାଇଜର ସପନ ହଜିଛି

ରାବଣଙ୍କ ସଂଖ୍ୟା ଅନେକ ଏଠି,

ତ୍ରେତୟାରେ ଥିଲା ଗୋଟେ ସ୍ବର୍ଣ୍ଣ ଲଙ୍କା

କଳିଯୁଗେ ଏବେ ସେତ ସବୁଠି l

ପାଚୁର୍ଯ୍ୟ ଜୀବନ ରାଜାଠୁଁ ଅଧିକ

କଳା ଟଙ୍କା ବଳେ ଅୟସ ଚାଲେ,

କଳା କାରନାମା ଲୁଚିଥାଏ ତହିଁ

ରାତ୍ରୀ ଅନ୍ଧକାର ପରଦା ତଳେ l

ଲୋଭ ମୋହ ମଦ ମାତ୍ସର୍ଯ୍ୟଆଦି 

ବଢିଯାଇଅଛି ଏଯୁଗଟିରେ,

ଦୟା କ୍ଷମା ଆଉ ପରଉପକାର

କବର ନେଇଛି ହୃଦ କୋଣରେ l

ଖଣି ଖାଦାନ କୁ ଲୁଟିଖାଉଥାନ୍ତି

ତେଲିଆ ମୁଣ୍ଡରେ ଢାଳନ୍ତି ତେଲ,

ଦୁଃଖୀ ଜନତା ଭୋକିଲା ପେଟରେ

ଉପରକୁ ଚାହେଁ ହୋଇ ବିକଳ l

ଚୋରୀ ଲୁଟ ଦଙ୍ଗା ଆଉ ରାହାଜାନୀ

ଦିବା ଲୋକେ ଆଜି ଘଟୁଛି ସବୁ,

ସରଳ ମଣିଷ ଉପାୟ ନପାଇ

ନିରତେ ଖୋଜୁଛି ତୁମକୁ ପ୍ରଭୁ l

ସତେକି ଶ୍ରୀରାମ ନେବେ ଅବତାର

ରାବଣ ପାଇବେ ତାଙ୍କର ଶାସ୍ତି,

ଫେରିଆସିବ ରାମ ରାଇଜ ଜଗତେ

ଜନତା ପାଇବେ ଟିକିଏ ଶାନ୍ତି l