ରାମ ନବମୀ

ରଘୁକୁଳମଣି ଶ୍ରୀରାମ ଦଶରଥ ଆତ୍ମଜ

ଲକ୍ଷ୍ମଣ ଭରତ ଶତୃଘ୍ନଙ୍କର ଥିଲେ ଅଗ୍ରଜ ।

ଅଜ ଆତ୍ମଜ ଦଶରଥ ପୁତ୍ରେଷ୍ଟି ଯଜ୍ଞ କଲେ 

ଯଜ୍ଞପୁରୁଷ ସ୍ବୟଂ ଚରୁ ଧରି ପ୍ରକାଶ ହେଲେ ।

କୌଶଲ୍ୟା କୈକେୟୀ ସୁମିତ୍ରା ରାଣୀ ଚରୁ ପାଇଲେ 

ତିନି ରାଣୀଙ୍କ ଗରଭରୁ ଚାରି କୁମର ହେଲେ ।

କୌଶଲ୍ୟାଙ୍କ ଗର୍ଭୁ ଜନ୍ମିଲେ ରାମ କୈକେୟୀ ଗର୍ଭୁ 

ଜନ୍ମିଲେ ଭରତ ଲକ୍ଷ୍ମଣ ଜାତ ସୁମିତ୍ରା ଗର୍ଭୁ ।

ଶତୃଘ୍ନ ଲକ୍ଷ୍ମଣ ଯମଜ ଭାଇ ହୋଇଲେ ଜାତ 

ଶ୍ରୀରାମ ନବମୀ ଦିନରେ ସର୍ବେ ହେଲେ ସମ୍ଭୂତ ।

ଚଇତ୍ର ଶୁକଳ ନବମୀ ଗୁରୁବାର ମଧ୍ୟାହ୍ନେ

ପୁନର୍ବସୁ ନାମ ନକ୍ଷତ୍ର ଜନ୍ମ କର୍କଟ ଲଗ୍ନେ ।

ଉତ୍ସବମୁଖର ଅଯୋଧ୍ୟା ପୁରୀ ହେଲା ଉଷତ 

ଧରମ ରକ୍ଷଣ କାରଣେ ରାମ ହୋଇଲେ ଜାତ ।

ବିପ୍ରପ୍ରିୟ ରାମ ସୀତୟାପତି ଧାର୍ମିକ ବୀର 

ରଘୁପତି ରାଜେନ୍ଦ୍ର ସତ୍ଯସନ୍ଧ ଶାନ୍ତ ମୂରତି ଧୀର ।

ଲୋକ ଅଭିରାମ ଶ୍ରୀରାମ ରାକ୍ଷସଙ୍କ ବଇରି 

ରାବଣ ବଧି ବିଭୀଷଣେ ଲଙ୍କା ରାଜନ କରି ।

କୀରତି ସ୍ଥାପିଲେ ଧରାରେ ହେଲା ରାମ ରାଇଜ

ରାମ ରୋମେ ରୋମେ ବସନ୍ତି ପରମାନନ୍ଦ ଅଜ ।

ରାମ ନବମୀରେ ରାମଙ୍କ ବ୍ରତ ପୂଜନ କରି 

ତରନ୍ତି ଭକତେ ରାମଙ୍କ ନାମ ଭଜନ କରି ।

ତୁଣ୍ଡେ ରହିଥାଉ ଶ୍ରୀରାମ ନାମ ଗୋଟିକ ମୋର

କି କରିବ କାଳ ଯମ ସେଥିକି ନାହିଁ ଖାତର ।