ରାକ୍ଷୀ ରହିଲା ସାକ୍ଷୀ

ରଖିଛି ସଜାଇ ମୋ ସୁନା ଭଉଣୀ

ଅର୍ଘ୍ଯଥାଳୀ ପୁଷ୍ପ ଦୀପ

ଚନ୍ଦନ କୁଙ୍କୁମ ଅକ୍ଷତ ସହିତ

ରେଶମୀ ରକ୍ଷା କବଚ ।

ଶ୍ରାବଣ ପୂର୍ଣ୍ଣମୀ ପବିତ୍ର ଉତ୍ସବ

ରକ୍ଷାବନ୍ଧନର ଦିନ

ଭାଇକୁ ବନ୍ଦାଇ ଭଉଣୀ ମନାସେ

ମମତା ସେନେହ ପ୍ରେମ ।

ରହିଅଛି କଥା ପୁରାଣେ ବର୍ଣ୍ଣିତ

ବୈକୁଣ୍ଠ ନିବାସ ଛାଡି

ଆସିଥିଲେ ସ୍ବୟଂ ଭଗବାନ ବିଷ୍ଣୁ

ପରିସ୍ଥିତି ଚକ୍ରେ ପଡି ।

ପ୍ରିୟ ଭକ୍ତ ଥିଲେ ଅସୁର ସମ୍ରାଟ 

ପ୍ରହ୍ଲାଦଙ୍କ ନାତି ବଳୀ

ପ୍ରାସାଦେ ଶ୍ରୀବିଷ୍ଣୁ କରି ଅବସ୍ଥାନ 

ସଙ୍କଟକୁ ଥିଲେ ଟାଳି ।

ବ୍ରାହ୍ମଣୀ ବେଶରେ ଆସି ମହାଲକ୍ଷ୍ମୀ

ପହଞ୍ଚି ବଳୀ ପ୍ରାସାଦେ

ବଳୀଙ୍କୁ ହସ୍ତରେ ପିନ୍ଧାଇଲେ ରାକ୍ଷୀ

ମମତା ସ୍ନେହ ସୌହାର୍ଦ୍ଦେ ।

ସୁକର୍ତ୍ତବ୍ଯ ବୋଧେ ଅସୁର ରାଜନ

ଭଗିନୀଙ୍କ ମନ ବୁଝି

ନିବେଦନ କଲେ ରହନ୍ତୁ ବୈକୁଣ୍ଠେ

ସର୍ବେ ହେବୁ ଆମ୍ଭେ ଖୁସି ।

କଟି ଯାଇଥିଲା କୃଷ୍ଣଙ୍କ ଅଙ୍ଗୁଳି

ଶିଶୁପାଳ ବଧ ବେଳେ

ପିନ୍ଧା ବସ୍ତ୍ର ଚିରି ତୁରନ୍ତ ଦ୍ରୋପଦୀ

କ୍ଷତ ସ୍ଥାନେ ବାନ୍ଧିଥିଲେ ।

କୁରୁସଭା ସ୍ଥଳେ ଦୁଷ୍ଟ ଦୁଃଶାସନ 

କରିଲା ବସ୍ତ୍ର ହରଣ

ଦେଇ କୋଟି ବସ୍ତ୍ର ଭଗିନୀ କୃଷ୍ଣାର

ଲଜ୍ଜା କଲେ ନିବାରଣ ।

ନୁହେଁ ମାତ୍ର ରାକ୍ଷୀ ରେଶମୀର ଡୋରୀ

ଅତୁଟ ସ୍ନେହ ବନ୍ଧନ

କରିଥାନ୍ତି ଭ୍ରାତ ସତ୍ଯ ସୁସଙ୍କଳ୍ପ 

ରଖିବେ ଭଗ୍ନିର ମାନ ।