Library
Profile
ପୟ ପୟୋଧିପତି ସ୍ତୁତି
ପୟ ପୟୋଧିପତି ସ୍ତୁତି
ପୟ ପୟୋନିଧି ଭଵନ ପୟୋଧର ସୁନ୍ଦର
ପୟରୁ ପ୍ଲାବିତ ପାବିନୀ ପୟସ୍ବିନୀ ନିର୍ଝର |
ପ୍ରଶାନ୍ତ ପ୍ରସନ୍ନ ପୀୟୂଷାନନ ପଦ୍ମପୟର
ପଦ୍ମନାଭ ପୀତ ଅମ୍ବର ପ୍ରଭୁ ପରମେଶ୍ୱର |
ପରନ୍ତପ ପରଂବ୍ରହ୍ମନ ପ୍ରିୟ ପରାତପର
ପରମେଶ ପଦ ପଙ୍କଜ ସ୍ମରେ ମୁଁ ନିରନ୍ତର |
ପଦ୍ମା ପଦ୍ମାଳୟା ପଦ୍ମିନୀ ପ୍ରକ୍ଷାଳିତ ପୟର
ପନ୍ନଗାରି ବୀଶ ପ୍ଲବେଶ ହନୁ ଯା ପରିଚର |
ପଦ୍ମ ଅରି ଦର ମୁଦ୍ଗର ପ୍ରିୟ ଆୟୁଧବର
ପରବ ପୂର୍ଣ୍ଣେନ୍ଦୁ ପ୍ରଫୁଲ୍ଲ ପାରିଜାତ ଅଧର |
ପବନ ପାବକ ପୟୋଧିପତି ଅହିମକର
ପ୍ରଣିପାତ୍ୟ ପୁରନ୍ଦରାଦି ଦିଗପାଳ ଅମର |
ପଦେ ପଦେ ପଦ ବନ୍ଦନ୍ତି ପଦ୍ମଯୋନି ସ୍ତବର
ପଞ୍ଚାନନ
ପଞ୍ଚ ଆନନେ ସ୍ତୁତି ଗାନେ ତତ୍ପର |
ପଦ୍ମାସନେ ମୁନି ଋଷିଏ ଧ୍ୟାନରତ ଯୋଗର
ପ୍ରପନ୍ନ ଚଉଦ ଭୁବନ ସର୍ବ ଚର ଅଚର |
ପ୍ରବଦନ୍ତି ଉପନିଷଦ ବେଦ ଗୁଣ ଯାହାର
ପ୍ରକୀର୍ତ୍ତିତ ଶାସ୍ତ୍ର ପୁରାଣେ ଯାର ମହତ୍ୱ ସାର |
ପ୍ରକୃତି ପୁରୁଷ ରୂପରେ କରୁଅଛ ବିହାର
ପରମେଷ୍ଠୀ ପରମେଶ ହେ ଖିଳ ବିଶ୍ୱ ଆଧାର |
ପ୍ରତି ଅଣୁ ପରମାଣୁରେ ବ୍ୟାପ୍ତ ସୃଷ୍ଟି ଚକ୍ରର
ପ୍ରକଟିତ କରି ପ୍ରକୃତି ପ୍ରଳୟାନ୍ତେ ସଂହାର |
ପରମାନନ୍ଦ ହେ ମାଧବ ପ୍ରଜାପତି ଶଙ୍କର
ପ୍ରଣତ ପ୍ରଣମ୍ୟ ସଚ୍ଚିଦାନନ୍ଦ ହୃଦୟେଶ୍ୱର |
ପ ପ୍ର ଆଦ୍ୟରେ ପ୍ରାନ୍ତରେ ଥାଇ ର ଅକ୍ଷର
ପଦରେ ପାଦରେ ସାଦରେ ଜଗା ପୂଜେ ଅକ୍ଷର |
