ପୂଜ୍ୟ ଗୁରୁଦେବ
ପୂଜ୍ୟ ଗୁରୁଦେବ
ପୂଜ୍ୟ ଗୁରୁଦେବ ଦେବତା ସମାନ
ତୁମ ପଦେ ରଖି ଲୟ
ଅତିକ୍ରମି ବାଧା ଜିଣିବି ଜଗତ
ତୁଟାଇ ମନରୁ ଭୟ l
ତୁମ କର ସ୍ପର୍ଶେ ଦୂର ହେଲା ମୋର
ଅଜ୍ଞାନ ତମସା ଘୋର
ଦେଖାଇଲ ତୁମେ ଶୂନ୍ୟରୁ ପୂର୍ଣ୍ଣକୁ
ବ୍ରହ୍ମମୟ ଏ ସଂସାର l
ମିଛ ଅଭିମାନ ମାୟାର ବନ୍ଧନ
ମନେ ଭରି ଅହଂକାର
ସୋପାନ ଚଢ଼ି ମୁଁ ଦେଖୁଥିଲି ସ୍ବପ୍ନ
ପଡ଼ି ଉଠି ବାରମ୍ବାର l
ହାତ ଧରି ମୋତେ ବାଟ କଢ଼ାଇଲ
ଶିଖାଇଲ ଭଲ ମନ୍ଦ
ସତ୍ୟ ପଥେ ଚାଲି ଯଶ ଅର୍ଜିବାକୁ
ଦେଇ ଥିଲ କିଛି ଶବ୍ଦ l
ସଂଘର୍ଷ ସୋପାନେ ସାଧନାର ପଥେ
ଭରିଲ ଉତ୍ସାହ ତୁମେ
ଶାମୁକା ଭିତରୁ ମୁକ୍ତା ସାଉଁଟିଲି
ଦୀର୍ଘ ମୋର ଅଭିଯାନେ l
ତୁମରି ଆକଟ ଶରୀରରେ ଛାଟ
ସ୍ନେହ ବୋଳା ମଧୁ ବାଣୀ
ଭରିଲା ଜୀବନେ ଅପୂର୍ଵ ଆନନ୍ଦ
ପୂର୍ଣ୍ଣତା ଦେଲା ଆଣି l
ତୁମରି ପଥକୁ ଅନୁସରି ଆଜି
ସମାଜେ ପାଉଛି ପୂଜା
ଜ୍ଞାନର ଆଲୋକ ବାଣ୍ଟୁଛି ଧରାରେ
ଉଡ଼ାଇ ବିଜୟ ଧ୍ବଜା l
ଗୁରୁ ବିନା କେହି କୌଣସି କ୍ଷେତ୍ରରେ
ସଫଳ ହୋଇନି କେବେ
ଗୁରୁ ନିନ୍ଦା କରି ପାଇନି କେ ମୁକ୍ତି
ତରି ନାହିଁ ଏହି ଭବେ l
ପୂଜ୍ୟ ଗୁରୁବର ଘେନ ବାର ବାର
ଭକ୍ତିପୂତ ମୋ ପ୍ରଣତି
ତବ ଆଶିଷ କୁ ଚାହିଁ ଥିବି ସଦା
କର ଯୋଡ଼ି ମଥା ପାତି l