ପତର ପେଣ୍ଡି
ପତର ପେଣ୍ଡି
ପ୍ରସ୍ତାବ ପଠାଇଛନ୍ତି ପଟ୍ଟନାୟକ ପଡ଼ା
ପସ୍ତାବନା ପତ୍ର ପାଡ଼ି ପଢ଼ନ୍ତି ପାଖୁଡ଼ା ।
ପରାଶର ପଣ୍ଡା ପରିକ୍ଷିତ ପୁରୋହିତ
ପୁଛନ୍ତି ପରଷିବାକୁ ପୂତ ପ୍ରେମାମୃତ ।
ପ୍ରସ୍ତାବକ ପ୍ରସ୍ତାବନେ ପ୍ରସରେ ପାର୍ବଣ
ପାରବତୀ ପଞ୍ଚ ଆନନ ପାଣିଗ୍ରହଣ ।
ପକ୍ଷ ଶୁକଳ ପଞ୍ଚମୀ ପରବର୍ତ୍ତୀ ଦିନ
ପୁରବାସୀ ପ୍ରମୋଦରେ ପ୍ରମୋହନ୍ତି ପ୍ରାଣ ।
ପଙ୍କଜ ଜନ୍ମା ପ୍ରବର ପ୍ରବର୍ତ୍ତନକାରୀ
'ପତର ପେଣ୍ଡି' ପାଇଁକି ପୋଥିପାଞ୍ଜି ଧରି ।
ପରାତଥାଳିରେ ପାନ ପଇଡ଼ ପଇତା
ପଞ୍ଚତୀର୍ଥ ପୟ ପଞ୍ଚଦୀପ ପ୍ରଦୀପିତା ।
ପାଟବସ୍ତ୍ର ପାଟରତ୍ନେ ପାଟ ପୀଢ଼ା ପଟି
ପାଟଳୀ ପୁଷ୍ପ ପ୍ରଶୋଭନାର୍ଥେ ପରିପାଟୀ ।
ପୁଣ୍ଯତୋୟା ପଞ୍ଚଗଙ୍ଗା ପୟରେ ପୟର
ପଖାଳିବା ପାଇଁ ପ୍ରଧାବିତ ପଟୁଆର ।
ପ୍ରବେଶନ୍ତେ ପଞ୍ଚାନନ ପୁର ପଦଚାରୀ
ପାଦାସନ ପଦେ ଅର୍ଘ୍ଯ ପ୍ରତ୍ଯର୍ପଣ କରି ।
ପୀଠେ ଶୋଭା ପଞ୍ଚବର୍ଣ୍ଣୀ ପିତ୍ତଳ ପ୍ରତିମା
ପୁରୁଷ ପୌରୁଷଶ୍ରେଷ୍ଠ ପାର୍ଶ୍ବେ ପାଟଜେମା।
ପଞ୍ଚଦେବତା ପ୍ରସ୍ଥାପି ପୂର୍ଣ୍ଣ କଳସୀରେ
ପ୍ରଶନ୍ନ ପୂର୍ବପୁରୁଷେ ପୁତ୍ରୀ ପ୍ରଦାନରେ ।
ପଙ୍ଗତେ ପ୍ରଭୁଲାଗି ପଇତି ପକ୍ବ ଅନ୍ନ
ପ୍ରେମାନନ୍ଦେ ପରସ୍ପରେ ପ୍ରସାଦ ପ୍ରଦାନ ।
ପରିହସିତ ପରିଭାଷା ପରିବେଷଣେ
ପରିବ୍ରାଜେ ପରିତୋଷି ପ୍ରାଜ୍ଞେ ପ୍ରବଚନେ ।
'ପତର ପେଣ୍ଡି' ପ୍ରସୂତ ପୂତ ପ୍ରସାଧନୀ
ପ୍ରଭାତ-ପ୍ରଭା ପରାୟ ପ୍ରହ୍ଲାଦଦାୟିନୀ ।
ପାରମ୍ପରିକ ପୋଷାକେ ପାରିଷଦଗଣ
ପତିବ୍ରତା ପର୍ବତଜା ପରିଣୟ ପୂର୍ଣ୍ଣ ।
ପାପ-ପ୍ରତାପ ଧ୍ବଂସିନୀ ମାଆଙ୍କ ପାର୍ଶ୍ବର
ପାଲିଙ୍କିରେ ପ୍ରଶୋଭିତ ପନ୍ନଗାଧିଶ୍ବର ।
ପ୍ରଭୁତା ପଣ ପ୍ରଭାବେ ପ୍ରଭାବିତ ପ୍ରାଣୀ
ପ୍ରଭାକରୁଁ ପ୍ରଭାକୀଟ ପ୍ରଭେଦ ପ୍ରମାଣି ।
ପ୍ରମଥେ ପ୍ରସକ୍ତ ପଶସ୍ତିରେ ପ୍ରଲୋଭିତ
ପାପାଛାଦିତ ପୁଟେ ପ୍ରଲୁବ୍ଧେ ପ୍ରଲେପିତ ।
ପାଟ ପଟୁଆର ପୂର୍ଣ୍ଣ ପୁରେ ପୁରାଙ୍ଗନା
ପ୍ରିୟତମେ ପ୍ରିୟଭାଷୀ ପ୍ରୀତ ପ୍ରୀୟମାଣା ।
ପ୍ରିୟମ୍ବଦା ପିକଭାଷିଣୀ ପୀନ ବକ୍ଷୋଜା
ପ୍ରବର୍ତ୍ତେ ପ୍ରସାରିବାବୟବରେ ପାପ ଯା'।
ପ୍ରଦର୍ଶାଏ ପୁରୋଭାଗ ପ୍ରକମ୍ପାଏ ପୁଣ
ପ୍ରମତ୍ତାଏ ପାଦମୂଳ ପ୍ରହାରି ନର୍ତ୍ତନ ।
ପ୍ରସାରେ ପ୍ରାସ ପ୍ରମଦା ପଶ୍ଚିମାଭିନୟେ
ପରବାସେ ପୃଷ୍ଠଦେଶେ ପ୍ରହାର ପରାୟେ।
ପକ୍ଷାନ୍ତରେ ପଞ୍ଚବକ୍ତ୍ର ପାର୍ବଣ ପାରଣେ
ପ୍ରାଣୀ ପ୍ରୀତି ପୟୋନିଧି ପୂର୍ଣ୍ଣଗର୍ଭା ମଣେ ।
ପୁରୁଷ ପ୍ରକୃତି ପାଶେ ପ୍ରପଞ୍ଚ ପରାଣ
ପିଣ୍ଡୁ ପାପ ପ୍ରମୋଚନେ ପ୍ରସିଦ୍ଧି ପାର୍ବଣ ।