ପତି ପତ୍ନୀ

ଗୋଟିଏ ପୁରୁଷ ଗୋଟିଏ ନାରୀ

         ଗୋଟିଏ ଡୋରିରେ ବନ୍ଧା,

ବିଧାତା ଗଡିଛି ସେ ଅପୂର୍ବ ଯୋଡ଼ି

         ସୁଖରେ ଦୁଃଖରେ ଛନ୍ଦା ।

     ଏକ ବିନା ଆନ ଅଧା

ଜଣେ ଯଦି ହୁଏ ଅନ୍ଧାର ରଜନୀ,

          ଆନଟି ରଜନୀଗନ୍ଧା ।

ଜଣେ ଯଦି ହୁଏ ଦିବସର ସୂର୍ଯ୍ୟ

          ଅନ୍ୟଟି ସେ ସୂର୍ଯ୍ୟ ଶକ୍ତି,

ଜଣେ ଯଦି ହୁଏ ମହର୍ଷି ବଶିଷ୍ଠ

          ଆଉ ଜଣେ ଅରୁନ୍ଧତୀ ।

     ଜଣେ ପତ୍ନୀ ଜଣେ ପତି

ଜଣେ ଯଦି ହୁଏ ସ୍ବର୍ଗ ଅଧିଶ୍ବରୀ

         ଆଉ ଜଣେ ସୁରପତି ।

ପତି ଜୀବନର ଅମା ଅନ୍ଧକାରେ

          ପତ୍ନୀ ଆଲୋକ ବର୍ତ୍ତିକା,

ଅଙ୍କା ବଙ୍କା ପତ୍ନୀ ଜୀବନ ସରିତେ

         ପତି ହିଁ ଦୃଢ଼ ନଉକା ।

   ଜଣେ ଅହଂ ଆନ ଅହମିକା

ଜୀବନ ରଙ୍ଗୀନ ରଙ୍ଗ ମଞ୍ଚେ ପତି -

          - ନାୟକ, ପତ୍ନୀ ନାୟିକା ।

ଜୀବନ ସଂଗ୍ରାମେ ପତି ପତ୍ନୀ ଦୁହେଁ

          ଦ୍ରୁତ ସହଯୋଗୀ ଯୋଦ୍ଧା

ଜଣକୁ ଆଘାତ ଅନ୍ୟଠାରେ କ୍ଷତ

          ପତି ବିଷ ପତ୍ନୀ ସୁଧା। 

   ପତ୍ନୀ ହିଁ ଅଟେ ବସୁଧା 

ସହିଯାଏ ଦୁଃଖ ପିଇ ଯାଏ ଲହୁ

          ଦିଏ ନାହିଁ ତିଳେ ବାଧା ।

ପତ୍ନୀ ସହକର୍ମୀ ପତ୍ନୀ ସହଧର୍ମୀ

          ପତ୍ନୀ ଅଟେ ଅର୍ଦ୍ଧାଙ୍ଗିନୀ,

ସ୍ବାମୀ ଗର୍ବେ ଗର୍ବି ସିନ୍ଦୂର ଲଗାଇ

          ସାଜିଥାଏ ସିମନ୍ତିନୀ ।

     ସ୍ୱଭାବେ ନାରୀ ଦୁର୍ବଳା

ପତି ସାହଚର୍ଯ୍ୟ ଲାଭକରି ପତ୍ନୀ

          ବନିଯାଏ ଚାରୁଶିଳା ।

ପତ୍ନୀ ପତି ଦୁହେଁ ପରସ୍ପର ସାଥୀ

          ଜନ୍ମ ଜନ୍ମାନ୍ତର ପାଇଁ,

ସ୍ନେହ ଶ୍ରଦ୍ଧା ତ୍ୟାଗ ଓ ବିଶ୍ୱାସ ନେଇ

          ଦାମ୍ପତ୍ୟ ଜୀବନ ଜୀଇଁ ।

  ପରକୀୟା ପ୍ରୀତି ପାଇଁ 

ଛାରଖାର କରେ ସୁନାର ସଂସାର

          ଯେହ୍ନେ ପୂର୍ଣ୍ଣ ଗର୍ଭା ନଈ ।