ଆଜିର ନାରୀ

    

ପାଶ୍ଚାତ୍ୟ ସଂସ୍କୃତି ପଛରେ ଗୋଡ଼େଇ

      ନାରୀ ଭୁଲିଛି ସଂସ୍କାର,

ଶିକ୍ଷା, ଦୀକ୍ଷା, ବେଶ,ଭୂଷାରେ ସୁସ୍ପଷ୍ଟ

      ଅର୍ଦ୍ଧ ନଗ୍ନ କଳେବର।

   ଯୌବନର ବିଷକୁମ୍ଭେ,

ବିଷାକ୍ତ କରାଇ ସମାଜ ତାରୁଣ୍ୟ

       ନିର୍ଲଜ୍ଜାରେ ହସେ ଦମ୍ଭେ। ୧

ଶାଶୁ ଆଜି ତା'ର ଘର ଚାକରାଣୀ

        ଶ୍ବଶୁର ଘରର ଦାସ,

ବାସୀଶେଜେ ବସି ଚାହା ଆଣିବାକୁ

        ଯାଆକୁ ଦିଏ ଆଦେଶ,

   ମୁକୁଳିତ କେଶ ବାସ,

ନିଜେ ଯେଉଁପରି ସନ୍ତାନେ ସେପରି

         ହେବାକୁ ଦିଏ ନିର୍ଦ୍ଦେଶ। ୨

ସ୍ବେଛାଚାରୀ ସାଜି ନିଜ ଅଭିରୁଚୀ

         ନଦିଦିଏ ପରିବାରେ,

ନାରୀ କମିଶନ ଧମକ ଦେଖାଇ

         ଆତଙ୍କ ଖେଳାଏ ଘରେ।

    ସ୍ବାମୀ ତା କିଣା ଚାକର,

ଓଲମ ବିଲମ କରିଲେ ଆଦେଶ

           ବାସସ୍ଥାନ କାରାଗାର, ୩

ନାରୀ ଯଦି ଆଜି ସ୍ବେଚ୍ଛାଚାରୀ ହୁଏ

           ଘର ସଜାଡ଼ିବ କିଏ?

ସମାଜ ଶୃଙ୍ଖଳା ପଛରେ ପକାଇ

           ପାଶ୍ଚାତ୍ୟ ପଛରେ ଧାଏଁ,

    ସାଙ୍ଗସାଥୀ ମେଳେ ଯାଏ,

ବିଦେଶୀ ପାନୀୟ ପିଆଲାକୁ ଧରି

           ତାଳେ ତାଳେ ନଗ୍ନନାଚେ ଝୁମେ ।୪।

ଏ ସମାଜ ଆଜି ରସାତଳ ଗାମୀ

    ‍ଆଧୁନିକତାର ନାମେ,

ସିଧା ରାସ୍ତା ଛାଡ଼ି ସମାଜର ରଥ

           ଭୁଲ୍ ପଥରେ ଗମେ,

    ଏଥିପାଇଁ ଦାୟୀ ‍କିଏ ?

ପାଶ୍ଚାତ୍ୟ ସଂସ୍କୃତି ନାରୀ ସ୍ବାଧିନତା

          ନାରୀ କମିଶନ ଅବା ଆମେ ?