Library
ପତି ପତ୍ନୀ
ପତି ପତ୍ନୀ
ସଂସାର ସୃଷ୍ଟିର ବିଧାତାଙ୍କ ପାଦେ
କୋଟି ନମସ୍କାର ଢାଳି
ଲେଖନୀରେ ଆଜି ସଜାଇ ଆଙ୍କିଛି
ଦୁଇଟି କୁସୁମ ତୋଳି ।
ଗୋଟିଏ ବୃନ୍ତର ଦୁଇଟି ପାଖୁଡ଼ା
ଏକ ସଙ୍ଗେ ବିକସିତ
ପ୍ରେମ ପ୍ରୀତି ଜଳ ପ୍ରାପ୍ତ ନହୋଇଲେ
ବେନି ପ୍ରାଣ ହୁଏ ମୃତ ।
ସଂସାର ପାଦପେ ଜନମ ଲଭିଣ
ଧାରଣ କରନ୍ତି ଫଳ
କାହିଁ ରୁ ଉତ୍ପତ୍ତି କିଏ ବା କହିବ
ଲାଗେ ନାହିଁ ବୁଦ୍ଧି ବଳ ।
ଚାତକ ପରିକା ପଥ ଚାହିଁ ଥାନ୍ତି
ଭୋଜନ ଶୟନ ପାଇଁ
ଏକ ବୃକ୍ଷ ହେଲେ ଅନ୍ୟ ଯେ ବଲ୍ଲରୀ
ଜଗତକୁ ଶିକ୍ଷା ଦେଇ ।
ପୁରାଣେ ବର୍ଣ୍ଣିତ ନାରୀ ଦୋଷ ଗୁଣ
ଉଦରେ ରହୁନା କଥା
ତଥାପି କାହିଁକି ପୁରୁଷ ଶ୍ରୀହୀନ
ନାରୀ ବିନା ପାଏ ବ୍ୟଥା ।
ନାରାୟଣୀ ରୂପେ ପତ୍ତନ ସମୟେ
ପତିର ସମ୍ମୁଖେ ଆସି
ସୁରକ୍ଷା କବଚ ପରିକା ସଙ୍ଗତେ
ରୁହେ ସେ ବଳକୁ କଷି ।
ଗୃହର ସୌନ୍ଦର୍ଯ୍ୟ ପତି ପତ୍ନୀ ଭାବ
ଯେସନେ କୁମୁଦ ଇନ୍ଦୁ
ନିବିଡତା ଥିଲେ ପଶି ପାରେ ନାହିଁ
କେବେହେଁ ରାଜୀବ ବନ୍ଧୁ ।
ଯେହ୍ନେ ରୌଦ୍ରତାପେ ସୁଶୀତଳ ଜଳ
ଜୀବନକୁ ସୁଖମୟ
ସେହି ରୂପେ ଜାୟା କାନ୍ତର ଜୀବନେ
ଶାନ୍ତିରେ କରେ ବିଜୟ ।
ସୁମଙ୍ଗଳ କାର୍ଯ୍ୟେ ବେନି ପ୍ରାଣୀ ଲୋଡା
ଏହା ଯେ ମଙ୍ଗଳ ବିଧି
ପତ୍ନୀ ବିନା ପତି କାହିଁ ବି ହୁଏନା
ଏକା ବଞ୍ଚିବାରେ ସିଦ୍ଧି ।
