Library
Profile
ପ୍ରତିଶ୍ରୁତି
ପ୍ରତିଶ୍ରୁତି
ପ୍ରତିଶ୍ରୁତି ଦେବା ବଡ କଥା ନୁହେଁ
ପାଳନ କରିବା ବଡ
ଦେଲ ଯଦି ପଛଘୁଞ୍ଚା ଦିଅ ନାହିଁ
ଆସୁ ପଛେ ଯେତେ ଝଡ ।
ଜୀବନଟା ପଛେ ବାଜି ପଡି ଯାଉ
ରକ୍ଷା କର ପ୍ରତିଶ୍ରୁତି
ରଖି ନ ପାରିଲେ ସେଇ ପ୍ରତିଶ୍ରୁତି
ନିନ୍ଦାରେ ହେବ ଗଣତି ।
ମିଛ ବୋଲି ଏଇ ଦୁନିଆ କହିବ
ନିଜକୁ ଲାଗିବ ଛୋଟ
ନିଜ ପାଖେ ନିଜେ ତୁମେ ହାରି ଯିବ
ହେଉଥିବ ଛଟପଟ ।
ନିଜକୁ ଧିକାର ଲାଗିବ ବହୁତ
ମିଛ ପ୍ରମାଣିତ ହେବ
ମିଛୁଆ ବୋଲି ତ କହିବ ଜଗତ
କୁହ କି ସହି ପାରିବ ?
ହୋଇବ ଘୃଣିତ ହେବ ବି ଲଜ୍ଜିତ
ବିଦ୍ରୁପ କରିବେ କେତେ
ସହି ହେବ ନାହିଁ ସେଇ ଉପହାସ
ଭାସିବ ଲୁହର ସ୍ରୋତେ ।
ସାମାନ୍ୟ କଥାରେ ଭାସି ଯାଇ କେବେ
ଦିଅ ନାହିଁ ପ୍ରତିଶ୍ରୁତି
ପ୍ରତିଶ୍ରୁତି ଦେବା ପୂର୍ବରୁ ସମ୍ପୂର୍ଣ୍ଣ
ଶୁଣି ସ୍ଥିର ରଖ ମତି ।
ଭଲ ସେ ପରଖ ଭଲ କି ତନଖ
ସତ୍ୟତା ରହିଛି କେତେ
ବିବେକ ଖେଳାଅ ହୃଦୟେ ପଚାର
ତେବେ ଯାଇ ଦିଅ ସତେ ।
ଦେଇ ଦେଲ ଯଦି ସେଇ ପ୍ରତିଶ୍ରୁତି
ପଛକୁ ପାଦ ହଟନା
ଏ ଦୁନିଆ ପଛେ ଯାହା କହୁ ଥାଉ
ତା ସାଥି କେବେ ଛାଡନା ।
ବିପଦ ଆପଦ ଦୁଃଖ ସୁଖ ଆସୁ
ଆସୁ ଅବା ଝଡଝଞ୍ଜା
ନିଜ ପ୍ରତିଶ୍ରୁତି ନିଜେ ରକ୍ଷା କର
ଦିଅ ନାହିଁ ପଛଘୁଞ୍ଚା ।
ଏଇତ ଜୀବନ ଅଢେଇ ଦିନିଆ
ଚିରସ୍ଥାୟୀ ନୁହେଁ ଏହା
ପ୍ରତିଶ୍ରୁତି ଦେଲେ ପାଳନ ବି କର
ହେଇଯାଉ ପଛେ ଯାହା ।
ଯାଉ ଏ ଜୀବନ ରଖ ତ ବଚନ
ବଚନୁ ଓହର ନାହିଁ
ଥରେ ଯଦି ତୁମେ ଓହରି ଯାଇଛ
ପସ୍ତେଇବ ନିଶ୍ଚେ ତହିଁ ।
ଯେତେ ପସ୍ତେଇଲେ କିଛି ଲାଭ ନାହିଁ
ସିଏ କି ଫେରି ଆସିବ
ପ୍ରତି ମୁହୂର୍ତ୍ତରେ ସେଇ ପ୍ରତିଶ୍ରୁତି
ହାତ ଠାରି ହସୁ ଥିବ ।
ପ୍ରତିଶ୍ରୁତି ଯିଏ ରଖି ନ ପାରିବ
କେବେ କାହାକୁ ଦିଅନି
ପଛରେ ନିଜର ସ୍ବାର୍ଥକୁ ଦେଖିଣ
ଛଳନେ ଖସି ଯାଅନି ।
ସେଇ ଖସିବାଟା ମହଙ୍ଗା ପଡଇ
ଖୁସି ଧୋଇ ହେଇ ଯିବ
ଜୀବନର ସୁଖ ଶାନ୍ତି ହଜି ଯିବ
ଜଳି ଜଳି ବଞ୍ଚୁ ଥିବ ।
ତା ଆଖିର ସେଇ ଟୋପେ ଲୁହ ପାଇଁ
ବରବାଦ ହେଇଯିବ
ବିଶ୍ବାସ ଭରଷା ସବୁ ହରେଇବ
ହାରି ବସି କାନ୍ଦୁଥିବ ।
ସେଇ କାନ୍ଦ ଲୁହ ପୋଛି ଦେବା ପାଇଁ
ନା ଆସିବ କାହା ହାତ
ବଞ୍ଚି ଥିବ ସତ ଜୀବନ ନ ଥିବ
ହୋଇଣ ଦୋଷୀ ସାବ୍ୟକ୍ତ ।
ଯେତେ ଚାହିଁଲେ ବି ମକ୍ତି ପାଇବନି
କ୍ଷତାକ୍ତ ହେବନି ଇତି
ନିଃସଙ୍ଗ ଜୀବନେ ସଢୁ ଥିବ ସାଥେ
ଥିବ ମିଛ ପ୍ରତିଶ୍ରୁତି ।
