ପ୍ରତିଶୋଧ
ପ୍ରତିଶୋଧ
ଆମ ଚର୍ତୁପାର୍ଶ୍ୱ ବନ ସବୁଜିମା
ପ୍ରାକୃତିକ ପରିବେଶ
ଠିଆ ହୋଇଅଛି ଧ୍ୱଂସ ମୁଖେ ଆଜି
ବଢେ ପ୍ରଦୂଷଣ ତ୍ରାସ ।
ଆମ ଅବିଚାର ଅବିମୃଶ୍ୟ କର୍ମ
ବିଷମୟ ପରିଣାମ
ଭୋଗିବାକୁ ହେବ ନିକଟ ଭବିଷ୍ୟେ
ସଙ୍କଟରେ ବର୍ତ୍ତମାନ ।
ବଢ଼ି ବଢ଼ି ଚାଲେ ଉପଭୋଗ ସୀମା
ସମ୍ବଳ ଉପରେ ଚାପ
କୂପିତ ପ୍ରକୃତି ଜଳ ସ୍ଥଳ ବାୟୂ
ଦେଖାଉଛନ୍ତି ପ୍ରକୋପ ।
ସବୁଜ କୋଠରୀ ପ୍ରଦୂଷିତ ବାଷ୍ପ
ଉତ୍ତାପ କରୁଛି ବୃଦ୍ଧି
ଓଜନ ମଣ୍ଡଳେ ବଢୁଅଛି ଛିଦ୍ର
କ୍ଷତିକର ସୂର୍ଯ୍ୟ ରଶ୍ମି ।
ତରଳେ ବରଫ ଉଚ୍ଚ ହିମାଳୟେ
ମେରୁ ସ୍ଥଳେ ହିମବାହ
ବୁଡିବ ଅଚିରେ ବହୁ ଉପକୂଳ
ଜନାକିର୍ଣ୍ଣ ସ୍ଥାନମାନ ।
ପ୍ରବଳ ଉତ୍ତାପେ ହେବ ମରୁଭୂମି
ଶୁଖିଯିବ ନଦୀ ହ୍ରଦ
ଖସିଯିବ ନିମ୍ନେ ଭୂଜଳ ସ୍ତର
ମିଳିବନି ମୁନ୍ଦେ ଜଳ ।
ଅଭାବ ହୋଇବ ଶୁଦ୍ଧ ଅମ୍ଳଜାନ
ମରିଯିବ ଗଛଲତା
ଦୁରୂହ ହୋଇବ ମଣିଷ ଜୀବନ
ଘାରୁଅଛି ବଡ଼ ଚିନ୍ତା ।
ପ୍ରଶମିତ ହେଉ ପ୍ରକୃତିର କୋପ
ମଣିଷ ରହୁ ସଜଗ
ଅନୁକୁଳେ ଚଳୁ ପ୍ରକୃତି ସହିତ
ଏଡିବାକୁ ପ୍ରତିଶୋଧ ।
-------