ପ୍ରତିଶୋଧ

ପ୍ରତିଶୋଧ ପରାୟଣ ମଣିଷ

ଭୁଲିଯାଏ ସମ୍ପର୍କର ପରିଭାଷା

ଦୟା କ୍ଷମା ଛାଡ଼ି ଜାନୁଆର ପାଲଟେ ।

ମାନବିକତା ବହୁ ଦୂରେ

ଆସୁରିକ ପ୍ରବୃତ୍ତି ବଶବର୍ତ୍ତୀ

ରକ୍ତ ପିପାସୁ ଧର୍ମର ପଥ ହୁଡେ ।

ପ୍ରମାଣ ଅଛି ଶାସ୍ତ୍ରରେ

କୋମଳ ମତି ପୁତ୍ରକୁ ବି ଛାଡ଼ି ନ ଥିଲା

ହିରଣ୍ୟକଶିପୁ ପ୍ରତିଶୋଧ ଅଗ୍ନିରେ ।

ଜଳରେ ବୁଡାଇ ପାହାଡ଼ରୁ ଗଡ଼ଇ

ନିଆଁରେ ପୋଡିବାର 

ବାରମ୍ବାର ପ୍ରୟାସ ।

ବିଷ୍ଣୁ ଆଶ୍ରିତ ପ୍ରହ୍ଲାଦ 

ବର୍ତ୍ତିଥିଲା ପିତାଙ୍କ କ୍ରୋଧରୁ

ହରିଙ୍କ ନାମ ସ୍ମରି ।

ମଗଧ ସମ୍ରାଟ ଚଣ୍ଡାଶୋକଙ୍କ

ପ୍ରତିଶୋଧରେ ଦୟାନଦୀ

ରକ୍ତ ରଞ୍ଜିତ ।

କଳା ପାହାଡ଼ର କ୍ରୋଧାଗ୍ନିରେ

ଉତ୍କଳର ଅସଂଖ୍ୟ ମନ୍ଦିର

ଭଗ୍ନସ୍ତୂପ ।

ପ୍ରତିଶୋଧ ଅପୂରଣୀୟ କ୍ଷତି କରେ

କିଛି ମିଳେନି

ହରାଇବାକୁ ପଡେ ବେଶି ।

କୁଆଁରୀ ଝିଅ ଅନ୍ତସତ୍ବା ଜାଣି

ପ୍ରତିଶୋଧ ନେବାକୁ ବାପା

ଆଗେଇ ଗଲେ ଯୁବକ ପାଖକୁ ।

ଯୁକ୍ତିତର୍କ ମଧ୍ୟରେ ଯୁବକ

ସ୍ବୀକାର କଲାନି ଭୁଲ

ପିତା ପୁତ୍ର ପ୍ରତିଶୋଧରେ ହତ୍ଯା କଲେ ।

ଆଇନ ହାତକୁ ନେଇ ପିତାପୁତ୍ର

ପୋଲିସ ହାଜତରେ

ମାଆ ଝିଅ ଦୁନିଆଁର ରାଜଦାଣ୍ଡେ

ଠୋକର ଖାଇଲେ ।

ସମୟକ୍ରମେ ପୋଲିସ ହାଜତରେ

ପିତାଙ୍କ ମୃତ୍ୟୁ ହୁଏ

ପୁତ୍ର ଖଲାସ ଚଉଦ ବର୍ଷ ପରେ ।

ମଣିଷ ମରା କହି ପଡୋଶୀ

ଘୃଣା କଲେ

ମାଆ ଝିଅଙ୍କ ପତ୍ତା ନ ଥିଲା ।

ପ୍ରତିଶୋଧର ନିଆଁରେ

ସବୁ ଶେଷ ହୋଇଗଲା

ଏତେ ବଡ଼ ଦୁନିଆରେ

ନିଜର ବୋଲି କେହି ନ ଥିଲେ ।