ପ୍ରଥମାଷ୍ଟମୀ
ପ୍ରଥମାଷ୍ଟମୀ
ପହିଲି ସନ୍ତାନ ମଙ୍ଗଳ ନିମନ୍ତେ
ପାଳି ଥାଉ ପ୍ରଥମାଷ୍ଟମୀ
ଜ୍ୟୋଷ୍ଠକୁ ଶ୍ରେଷ୍ଠ କରି ବିଦ୍ୟମାନ
ମଙ୍ଗଳ ମନାସେ ଜନନୀ ।
ଓଡ଼ିଶା ରାଜ୍ୟର କୋଣନୁକୋଣେ
ପାଳୁ ଆମେ ଏହି ପର୍ବ
ମାର୍ଗଶୀର ମାସ ଅଷ୍ଟମୀ ତିଥିକୁ
ଅଷ୍ଟମୀ ପାଳି ଥାଉ ସର୍ବ ।
ପ୍ରାତଃ ରୁ ସ୍ନାନ କରି ଗୃହ ବଧୂ
ରାନ୍ଧେ ସ୍ବାଦିଷ୍ଟ ବ୍ୟଞ୍ଜନ
ଏଣ୍ଡୁରି ପିଠାକୁ କରି ପ୍ରସ୍ତୁତ
କରିଥାଏ ବନ୍ଦାପନ ।
ନୂତନ ଚାଉଳ ନୂତନ ବିରିରେ
ପିଠା କ୍ଷୀରି କରିଥାଏ
ହଳଦୀ ପତ୍ରରେ ସିଝା ପିଠାକରି
ସଭିଙ୍କୁ ପରସି ଯାଏ ।
ନୂତନ ପୋଷାକ ପିନ୍ଧାଇ ଜ୍ୟୋଷ୍ଠକୁ
ଚନ୍ଦନ, ସିନ୍ଦୂର ଦିଏ
ହଳଦୀ ପତ୍ରର ପିଠାରୁ ଖଣ୍ଡିଏ
ପ୍ରସାଦେ ଖୁଆଇ ଥାଏ ।
ସର୍ବଦା ନିରୋଗ, ସ୍ବାସ୍ଥ୍ୟବାନ ହେଉ
ପ୍ରଭୁଙ୍କୁ ଗୁହାରି କରେ
ସନ୍ତାନ ଦୀର୍ଘାୟୁ କାମନା କରିଣ
ଭକତି ଭାବରେ ଝୁରେ ।