ପ୍ରଥମାଷ୍ଟମୀ

ମିଟୁ କହୁଛି ଜାଣିଲୁ ପିଣ୍ଟୁ

ମାମୁନି,ମୁନା,ମିଲି

ନୂଆ ପୋଷାକ ପିନ୍ଧି ବୁଲିବା

ପ୍ରଥମାଷ୍ଟମୀ କାଲି ।

ଏଣ୍ଡୁରି ପିଠା ତିଆରି ପାଇଁ

ଯାହା ଯେ ଦରକାର

ଯୋଗାଡ଼ ରେ ହିଁ ଲାଗିଗଲେଣି

ଆଜିଠୁ ବୋଉ ମୋର ।

ବଡ଼ ଭଣଜା ଭାଣିଜୀ ପାଇଁ

ପୋଷାକ ମାମୁଁ ନେଇ

ଅଷ୍ଟମୀ ହେତୁ ପୋରୁଁହା କରି

ଆସିବେ କାଲି ସେହି ।

କିଛି କାରଣୁ ନ ଆସିଲେ ବି

ଯା ମାମୁଁ ଘର ଦୂର

ଅଷ୍ଟମୀ ପାଇଁ ଆଗରୁ ଟଙ୍କା

ପଠାନ୍ତି ମାମୁଁ ଘର ।

ପ୍ରାୟ ସମସ୍ତ ବସ୍ତ୍ରାଳୟ ରେ

ପ୍ରଥମାଷ୍ଟମୀ ଯାଏଁ

ପୋଷାକ କିଣା ପାଇଁ ପ୍ରବଳ

ଭିଡ଼ ଯେ ଲାଗିଥାଏ ।

କାଲି ସଅଳ ଉଠି ଗାଧୋଇ

ନୂଆ ଜାମା କୁ ପିନ୍ଧି

ଗୁରୁଜନଙ୍କ ଆଶିଷ ନେବା

ପ୍ରଣାମ ତାଙ୍କୁ ହୋଇ ।

ତା'ପରେ ସାଙ୍ଗ ହଳଦୀ ପତ୍ରେ

ପ୍ରସ୍ତୁତ ପିଠା ଖାଇ

ସାହି ପଡ଼ିଶା ଖୁସି ମନରେ

ବୁଲିବା ସାଥୀ ହୋଇ ।

ମାପ କାଠିରେ ମାପ ନ କର

ମାମୁଁ ଙ୍କ ଉପହାର

ଭଣଜା ଆଉ ଭାଣିଜୀ ପାଇଁ

ମୂଲ୍ୟ ତା'ର ଅପାର ।