ପ୍ରଥମ ପ୍ରେମ
ପ୍ରଥମ ପ୍ରେମ
ଆଜି କାଲି ପରି ଆଇ ଲଭ୍ ଇୟୁ କହିବା ସେ ଯୁଗେ ବିରଳ ଥିଲା ।
ଆଖିରେ କାହାର ଆଖି ମିଶିଗଲେ ବଡ କଥାଟିଏ ହେଲା ।
ବିଦ୍ୟାଳୟ ସାଥୀ ଶୈଶବର ମନ ନଥିଲା ମନରେ କିଛି
ସାଂଗ ହୋଇ ଯାଉ ସାଂଗ ହୋଇ ଆସୁ ଫୁଲ ହୋଇଯାଏ ବିଂଚି ।
ସାଂଗ ସାଥି ମିଶି ଯୋଡି ଦେଲେ ନାମ ନଆସୁ ଆଦ୍ୟ ଯୌବନ
ପ୍ରେମର ପ୍ରେମିକା ସେ ମୋର ଏକତରଫା ସେ ପ୍ରେମ ।
ଲୁଚି ଲୁଚି ତାକୁ ଦେଖିବାରେ କଟେ ଦିନର ଅଧିକ ଭାଗ
ତା ସୁନ୍ଦର ମୁହଁ ଆଚାର ବିଚାର କିଣିନିଏ ମନଯୋଗ ।
ନଇକୁ ଗାଧୋଇ ଗଲେ ସେ ବାଟରେ ବହିଖଣ୍ଡେ ଧରି ବସେ
କଣେଇ କଣେଇ ତାକୁ ଦେଖି ଦେଲେ ବଂଚିବାର ରାହା ଦିଶେ ।
ଭାଦ୍ରରେ ବାଲୁଙ୍କା ପୁଜେ ଚାରିପାଳି ଭୋଗ ଟିକେ ସିନା ଦିଏ
ମୁହଁକୁ ଉଠାଇ ଚାହଁ ହୁଏନାହିଁ କି ଲାଭ ସେଥିରେ ହୁଏ !
ବହି ମାଗିବାର ବାହାନାରେ ଯଦି ତା ଘରେ ହାବୁଡି ଗଲି
ବାପା ଭାଇ ତା'ର ବାରଣ୍ଡାରେ ବସି ଆଆନ୍ତି ମୁଁ ସରିଗଲି ।
କଲେଜ ପାଠରେ ହଷ୍ଟେଲ ରହଣୀ ପ୍ରେମରେ ପଡିଲା ଭଟା
ଗାଁ ଝିଅ ସିଏ କଲେଜ ଯିବନି ନିୟମ ସାଜିଲା କଣ୍ଟା ।
ଥିଲା ମୋ ଆଦର୍ଶ ଝିଅଟିଏ ସିଏ ଦେବୀ ରୂପରେ ଗୁଣରେ
ସ୍କୁଲ ସାଥୀ ଏଇ ପରିଚୟ ନେଇ ଆଜି ଯିଏ ଯା ସଂସାରେ ।
ପ୍ରଥମ ପ୍ରେମର ସ୍ମୃତି ଆଜି ଯେବେ ମନକୁ ଆବୋରି ବସେ
ଇଚ୍ଛା ମୋ ହୁଏ ଫେରି ଆସନ୍ତା ନି ପିଲା ଦିନ କାଳ ବସେ ।
ଆଇ ଲଭ୍ ୟୁ କହି ମନ ସାଧ ମୋର ପୁରଣ କରନ୍ତି ଥରେ
ମୁହଁ ଖୋଲିଦେଲେ ପ୍ରିୟା କି ମୋହର ବାରଣ କରନ୍ତା ମୋରେ !!
-ବିଶ୍ଵେଶ୍ୱର ମାଝୀ-
majhibisweswar@gmail.com
9437697161