ପ୍ରଶ୍ନ ଓ ପ୍ରେମ

ପ୍ରେମ ଚିରନ୍ତନୀ କୁଳୁ କୁଳୁ ନାଦେ

ନିର୍ଝରି ଚାଲଇ ବହି

ମନରେ ତାହାର ପ୍ରଶ୍ନ ଅସୁମାରୀ

ଥକେ ନାହିଁ ବାଧା ପାଇ ।

ନିର୍ଝରିଣୀ ପରି ପ୍ରେମରେ ସ୍ବପନ

ପ୍ରଶ୍ନ ସବୁ ଛଳଛଳ

ମମତା ସ୍ନେହରେ ସବୁଜ ସୁନ୍ଦର 

ହସି ଉଠେ ଦୁଇ କୂଳ ।

ପ୍ରଶାନ୍ତ ସୁନ୍ଦର ନୀଳ ସମ୍ମୋହନ 

ମଧୁମୟ ପ୍ରୀତିପ୍ରେମ 

ପ୍ରାଣ ସୁକୋମଳ ହୃଦୟ ସ୍ପନ୍ଦନେ

ଉଚ୍ଚାଟଇ ଆକର୍ଷଣ ।

ବାଜେ ରୁଣଝୁଣ ଶବଦ ନିକ୍ବଣ

ନିବିଡେ ଭାବ ସମ୍ବନ୍ଧ 

ପ୍ରେମ ତଟିନୀର ପ୍ରଶ୍ନିଳ ଜଳରେ

ପବିତ୍ର ତୀର୍ଥ ସାନ୍ନିଧ୍ୟ ।

ଉକୁଟେ ଜୀବନ ଛାୟା ପ୍ରତିବିମ୍ବ 

ନୀଳ ସ୍ବଚ୍ଛ ଦର୍ପଣରେ

ଆବେଗ ସ୍ବଚ୍ଛନ୍ଦେ ସବୁ ପ୍ରଶ୍ନୋତ୍ତର 

ସମାହିତ ଏକାକାରେ ।