ପରଂବ୍ରହ୍ମ ଗୁରୁଦେବ

ମୋହାଚ୍ଛନ୍ନ ଲିପ୍ତ ବିଷାଦ ଆତ୍ମାର

ସୁପ୍ତ ଦେହ ମନ ପ୍ରାଣେ

ଭରିଦିଏ ଯିଏ ଅସୀମ ଶକ୍ତିର ଓଁକାର 

ସେତ ଏକା ପରଂବ୍ରହ୍ମ ଗୁରୁଦେବ

ଯେବେ ଅଜ୍ଞାନତମସାରେ ହଜାଇ ଦିଗ

ତିଳ ତିଳ କରି ଜୀବନକୁ ଦିଏ ଜଳାଞ୍ଜଳି

ଦିଗଦର୍ଶକ ସାଜନ୍ତି ଜ୍ଞାନର ପ୍ରଦୀପ ଜାଳି

ସେତ ଏକା ପରଂବ୍ରହ୍ମ ଗୁରୁଦେବ

 

ଅକାତକାତ ଭବସାଗର ପାରାବାରେ 

ଭାସି ଚାଲି ଥାଏ ନିର୍ଦ୍ଦିଷ୍ଟ ମୃତ୍ୟୁ ଗହ୍ୱରେ

ପରଶ ମାତ୍ରେ ମୃତ୍ୟୁକୁ ରୂପାନ୍ତର କରନ୍ତି ଅମୃତରେ

ସେତ ଏକା ପରଂବ୍ରହ୍ମ ଗୁରୁଦେବ

ସ୍ୱପ୍ନ ବିଭୋରେ ଧାଇଁ ମରିଚିକା ପଛେ 

ପାପର ପଙ୍କେ କରେ ଯେବେ ଅବଗାହନ 

ତୋଳି ଧରି କୋଳେ ସ୍ନାନ କରାନ୍ତି ପୂଣ୍ୟତୋୟା ଜଳେ

ସେତ ଏକା ପରଂବ୍ରହ୍ମ ଗୁରୁଦେବ

କିଏ ବା ପାଇଛି ତାଙ୍କ ପରିଚୟ

ଗୁରୁ ଏକ ବ୍ୟକ୍ତି ନୁହଁ ଚେତନାର ପ୍ରବାହ

ଅସୀମ ଅନନ୍ତ ଅଚିନ୍ତ୍ୟ ଜ୍ଞାନର ବାହାକ

 ସେତ ଅବ୍ୟକ୍ତ ତ୍ରିପାଦ ବ୍ରହ୍ମର.....