ପରମ ମିତ
ପରମ ମିତ
![](https://cdn.storymirror.com/static/1pximage.jpeg)
1 min
![](https://cdn.storymirror.com/static/1pximage.jpeg)
386
ଦୁଃଖରେ ସୁଖରେ ଅବା ଶରଧାରେ
ପାଶେ ସଦା ଛିଡା ହୁଏ,
ନିମତାକୁ ତାର ଅପେକ୍ଷା ନଥାଏ
ସତେ ଅବା ଅଙ୍ଗଟିଏ ।
ଅବାଟକୁ ପାଦ ଥାପିବା ପୂର୍ବରୁ
ହାତ ଟିକୁ ଟାଣି ଧରେ,
ଭଲ ଓ ମନ୍ଦର ପ୍ରଭାବ ଚେତାଇ
ବିପଦରୁ ରକ୍ଷା କରେ ।
ଆଖି ଲୁହ ତାର ମରମକୁ ଛୁଏଁ
ଅନ୍ତର କଥା ସେ ବୁଝେ,
ଯନ୍ତ୍ରଣାରେ ନିଜେ ନିଜକୁ ଭିଜେଇ
ସମାଧାନ ପନ୍ଥା ଖୋଜେ ।
ଦୁନିଆଟା ଯେବେ ହୋଇଯାଏ ପର
ଯାଏନି ଦୂରେଇ ସିଏ,
ପରିସ୍ଥିତି ସାଥେ ମୁକାବିଲା କରି
ପାଶେ ସଦା ରହିଥାଏ ।
ସାଥି ହେବା ପାଇଁ ବାହାନା ଖୋଜଇ
କେବେ ମିଛ କେବେ ସତ,
ଅଳିକ ଜୀବନେ ଭରଇ ହରଷ
ଅଟେ ସେ ପରମ ମିତ ।